Soltústik Qazaqstan oblysynda turǵyn úi-kommýnaldyq sharýashylyq bóliminiń basshysy ornatylmaǵan sý tazartý modýli úshin merdigerge 31,3 mln teńge tólegen. Bul týraly prokýratýranyń baspasóz qyzmeti málimdedi, dep habarlaidy Dalanews.kz.
Zańbuzýshylyqtardy prokýrorlar jergilikti atqarýshy organdardy tekserý barysynda anyqtaǵan.
"Esil aýdanynyń TÚKSh bóliminiń basshysy memlekettik satyp alý jáne memlekettik qyzmet týraly zań talaptaryn buzyp, oryndalǵan jumystar aktisine qol qoiyp, aýyldyq eldi mekenderge sý tazartý keshenin ornatýǵa bólingen 31,3 mln teńgeni jetkizýshige aýdarǵan. Alaida jumystar is júzinde oryndalmaǵan", – delingen prokýratýra málimetinde.
Dál osyndai zańbuzýshylyqtar oblystyń basqa aýdandarynan da tabyldy. Máselen, Qyzyljar aýdanynda Beskól aýyldyq okrýginiń ákimi aýdan ortalyǵy alańyn jańa jylǵa bezendirý qyzmetine jetkizýshige 8,4 mln teńge tólegen. Biraq atqarylýy tiis jumystar júzege aspaǵan.
"Aýyldyq okrýg ákimine "qyzmetine tolyq sáikes emestigi týraly eskertý" túrinde tártiptik jaza qoldanyldy, al aýdandyq TÚKSh bóliminiń basshysy qyzmetinen bosatyldy", – delingen habarlamada.
