Qaraǵandylyq burynǵy sýdia Karlyǵash Tátkeeva Resei tólqujatyn ielengeni belgili boldy, dep habarlaidy Dalanews.kz.
Bul týraly "Vyhod k pravde" Telegram-arnasy málimdedi.
"Asa iri kólemdegi alaiaqtyq jasady dep aiyptalyp, izdeý jariialanǵan burynǵy qazaqstandyq sýdia kórshi el aýmaǵynda jasyrynyp júrýi ábden múmkin.
Jariialanǵan derekterden Tátkeevanyń Resei azamattyǵyn qashan alǵany belgisiz. Degenmen onyń sýreti bazadaǵy reseilik qujattan alynǵany anyq kórinedi. Bul pasporttaǵy fotosýret shetterinde ornalasqan arnaiy belgiler arqyly dáleldenedi", – delingen habarlamada.
Tátkeevaǵa izdeý jariialanǵan sátte jaǵdaidy jaqsy biletin derekkózdiń aitýynsha, ol bireýdiń sot daýyn sheship berýge ýáde etip, 500 myń dollar alǵan. Biraq ýádesin oryndai almai, aqshany deldaldar arqyly qolhatpen qaitarǵan. Alaida deldaldar bastapqyda aqsha bergen adamǵa tolyq somany qaitarmaǵandyqtan, ol politsiiaǵa aryz túsirgen. Muny estigen soń, Tátkeeva jasyrynǵan.
Eske salaiyq, buǵan deiin Qaraǵandy oblysynyń mamandandyrylǵan aýdanaralyq ekonomikalyq sotynyń burynǵy sýdiasy Qarlyǵash Tátkeevaǵa asa iri kólemde alaiaqtyq jasady degen kúdikpen izdeý jariialanǵan edi. Bul týraly Sybailas jemqorlyqqa qarsy is-qimyl agenttiginiń resmi ókili Daniiar Biǵaidarov málimdedi.
Vedomstvonyń málimetinshe, eks-sýdiaǵa qatysty Qylmystyq kodekstiń 190-baby 4-bóligi ("Alaiaqtyq") boiynsha is qozǵalǵan. Qarlyǵash Tatkeeva birneshe adamnyń senimine kirip, iri kólemde qarjy iemdengen bolýy múmkin degen boljam bar.
Sybailas jemqorlyqqa qarsy qyzmet Tatkeevanyń naqty qaida ekenin biletin azamattarǵa úndeý jasap, kez kelgen aqparat úshin anonimdikke jáne syiaqy tóleýge kepil berip otyr.
Aita keteiik, Qarlyǵash Tatkeeva Joǵarǵy sotty qazirgi senator Jaqyp Asanov basqarǵan kezeńde Joǵarǵy Sot tóraǵasynyń azamattyq ister jónindegi keńesshisi bolǵan. Tatkeeva óziniń sot organdaryndaǵy jyldarynda Qaraǵandy oblysynyń mamandandyrylǵan aýdanaralyq ekonomikalyq sotynyń sýdiasy, sondai-aq Astana sotynyń sýdiasy bolyp qyzmet atqarǵan.
Qazirgi tańda quqyq qorǵaý organdary kúdiktiniń júrgen jerin anyqtaý jáne ony jaýapkershilikke tartý baǵytynda jedel izdestirý sharalaryn júrgizip jatyr.
