Qazaqstanda ǵylymi jobalardy qarjylandyrýǵa júrgizilgen aýdit qorytyndysy boiynsha úsh ǵylymi uiymnyń basshysy qyzmetinen bosatyldy, dep habarlaidy dalanews.kz.
Tekserý barysynda úsh jyl ishinde 51 mlrd teńgeniń qarjylyq zańbuzýshylyǵy anyqtalǵan. Bul týraly Joǵary aýditorlyq palata múshesi Nurlan Nurjanov Quryltaida ótken brifingte málimdedi.
Onyń aitýynsha, aýdit nátijesinde anyqtalǵan 51 mlrd teńgeniń 37,7 mlrd teńgesi qalpyna keltirilgen. Qalǵan qarajatty 2027 jyldyń birinshi toqsanynda qaitarý josparlanyp otyr.
«Úsh jyl ishinde 51 mlrd teńgeniń zańbuzýshylyǵy anyqtaldy. Aýdit barysynda osy somanyń 37,7 mlrd teńgesi qalpyna keltirildi. Qalǵan qarajatty 2027 jyldyń birinshi toqsanynda qaitarýdy kútip otyrmyz. Ol úshin tiisti nysandar boiynsha nusqamalardyń oryndalýyn qamtamasyz etý qajet», - dedi Nurlan Nurjanov.
Aýdit qorytyndysy boiynsha tórt adam qyzmetinen bosatylǵan. Taǵy eki adam ákimshilik jaýapkershilikke tartylǵan, al 18 adamǵa qatysty da ákimshilik sharalar qoldanylǵan. Sonymen qatar úsh material protsestik sheshim qabyldaý úshin quqyq qorǵaý organdaryna joldanǵan.
Ǵylym jáne joǵary bilim ministri Saiasat Nurbek qyzmetinen bosatylǵandardyń qatarynda Ǵylym institýtynyń tóraǵasy, Ulttyq ǵylymi-tehnikalyq aqparat ortalyǵynyń basshysy jáne Ǵylym qorynyń jetekshisi bar ekenin naqtylady. Sondai-aq ǵylymi protsesterdi uiymdastyrýǵa jaýapty ózge de tulǵalar qyzmetinen ketken.
Buǵan deiin Joǵary aýditorlyq palata Qazaqstanda ǵylymi jobalardy qarjylandyrý kezinde 51 mlrd teńgeniń qarjylyq zańbuzýshylyǵyn, sondai-aq 47 mlrd teńgeniń tiimsiz josparlanyp, paidalanylǵanyn anyqtaǵany habarlanǵan bolatyn.
