"Qazaqstannyń investitsiialyq qory" bankrotqa ushyraǵan eki kásiporynnyń múlkin taǵy da saýdaǵa qoidy. Qor bul óndiristik keshenderdi qaryz alýshylardan 2019 jyly qabyldap alǵan. Alaida sodan beri nysandarǵa jańa iesi tabylmaǵan, dep habarlaidy dalanews.kz.
Kentaýdaǵy zaýyt 643 mln teńgege baǵalandy
Za nami ýje vyehali telegram arnasynyń málimetinshe, Kentaýda ornalasqan baǵyttamaly burma zaýyty buryn Shymkenttegi "Ońtústikpolimetall" ónerkásiptik korporatsiiasyna tiesili bolǵan. Kompaniia 2018 jyly bankrot dep tanyldy. Onyń investitsiialyq qor aldyndaǵy bereshegi 2,72 mlrd teńgege jetken.
2019 jyly qor kepilge qoiylǵan zaýytty 525 mln teńgege qabyldap aldy. Bul kásiporyn qaryzynyń 20 paiyzyna da jetpeitin soma edi.
Sol kezdegi qabyldaý aktisinde jalpy aýmaǵy 18 myń sharshy metr bolatyn óndiristik tsehtardyń jaǵdaiy "qanaǵattanarlyqsyz" dep kórsetilgen. Al stanoktar, prester men krandardy qosa eseptegendegi 122 jabdyqtyń barlyǵy bólshektelgeni jazylǵan.
Qazir osy múlik aýktsion qujattarynda paidalanýǵa jaramdy dep kórsetilip, 643 mln teńgege baǵalanyp otyr. Bul qordyń zaýytty qabyldap alǵan kezdegi qunynan 118 mln teńgege joǵary.
Nysan biyl qańtar jáne qyrkúiek ailarynda da saýdaǵa shyǵarylǵan. Alaida eki aýktsionǵa da qatysýǵa ótinim túspegen.
Soltústik Qazaqstandaǵy óndiristik kesheni
Ekinshi nysan Soltústik Qazaqstan oblysynyń Taiynsha aýdanyndaǵy Chkalovo aýylynda ornalasqan. Jalpy aýmaǵy 8,8 gektardy qamtityn óndiristik keshenniń negizgi bóligi – buryn "Basko" seriktestigine tiesili bolǵan quramajem zaýyty.
Kásiporyn importtyq jabdyqtarmen jaraqtandyrylǵan. 2005 jyly onyń balanstyq quny 484 mln teńge bolǵan. Saýdaǵa shyǵarylǵan múlik quramyna quramajem zaýytynan bólek, naýbaihana, shujyq jáne konditerlik tsehtar, aýyldyq mádeniet úii men jataqhana da kirgen.
Baǵalaýshynyń qorytyndysynda naýbaihana, shujyq jáne konditerlik tsehtar apatty ári paidalanýǵa jaramsyz dep kórsetilgen. Mádeniet úiiniń de jaǵdaiy nashar. Al jabdyqtar uzaq ýaqyttan beri elektr jelisinen ajyratylǵandyqtan, olardyń jumys isteitini tekserilmegen.
Soǵan qaramastan, aýktsion sipattamasynda keshen paidalanýǵa jaramdy nysan retinde berilgen. Onyń bastapqy baǵasy – 502 mln teńge. Keshen qazan aiynda da osy baǵaǵa satylymǵa shyǵarylǵanymen, satyp alýǵa niet bildirgender bolmaǵan.
Eki nysan boiynsha kezekti aýktsion 27 qarashada ótedi.
