Aqtaýdaǵy ákimshilik quqyq buzýshylyqtar jónindegi mamandandyrylǵan sottyń qaýlysyna sáikes, prokýror Erbolat Ábdirovke qatysty is qylmys quramynyń bolmaýyna bailanysty toqtatyldy, dep habarlaidy Dalanews.kz.
Tergeý dereginshe, 27 tamyz kúni saǵat 23:00 shamasynda Air Astana áýe kompaniiasy ókilderi er adamnyń jolaýshylarǵa tiisip, olardy qorlap, qoǵamdyq tártipti buzǵany jóninde shaǵym túsirgen.
Sotta Ábdirov óz kinásin moiyndaǵan joq. Ol oqiǵa ushaqqa aparatyn avtobýsta bolǵanyn, mundai arnaiy kólik qoǵamdyq orynǵa jatpaitynyn, sondyqtan bul jaǵdaida qoǵamdyq tártipti buzý týraly aitýǵa negiz joq ekenin jetkizdi.
“Ózimdi ádepti ustadym, áreketterime tolyq esep berdim, jaǵdaiym qalypty boldy. Áýejai ǵimaratynda birneshe tekserýden ótken soń ǵana áýe kompaniiasynyń qyzmetkerleri meni reisten túsirdi”, – dedi prokýror.
Meditsinalyq saraptama onyń jaǵdaiy qalypty bolǵanyn rastady. Kýágerler de onyń beiádep sózder qoldanbaǵanyn aitty.
Sot Ákimshilik quqyq buzýshylyq týraly kodekstiń 434-baby («Usaq buzaqylyq») boiynsha qozǵalǵan isti qylmys quramy bolmaǵandyqtan toqtatty.
Eske salaiyq, Aqtaý prokýrorynyń ustalǵany jaily 9 qyrkúiekte belgili boldy. BAQ-ta onyń mas kúiinde janjal shyǵarǵany týraly aqparat taraǵan. Oqiǵa onyń eńbek demalysy kezinde oryn alǵany aityldy.
Erbolat Ábdirov 2024 jyldyń aqpan aiynda Aqtaý qalasynyń prokýrory bolyp taǵaiyndalǵan.
