İshki ister mınıstri Erjan Sádenov Talǵarda óltirilgen Sherzat Polattyń otbasy turatyn úıdi órteý isi boıynsha tergeý qalaı júrip jatqanyn aıtty, dep habarlaıdy Dalanews.kz.

Mınıstrdiń málimdeýinshe, bul is erekshe baqylaýda.

"İs arnaıy prokýrordyń óndirisinde. Tergeý áreketteri júrip jatyr. Tergeý jalǵasýda. Tergeý áreketterine qatysty pikir bere almaımyn. Jumys tolyq júrip jatyr, baqylaýda ustap otyrmyz", – dedi Sádenov Májilis kýlýarynda jýrnalıserdiń suraqtaryna jaýap bere otyryp.

Sonymen qatar, mınıstrden Sherzat Polattyń aǵasy Nurqanattyń ólimine qatysty tergeý týraly da suraldy.

"Qylmystyq is qozǵaldy, tergeý júrgizilip jatyr", – dep jaýap berdi mınıstr.

Eske salaıyq, buǵan deıin Talǵardaǵy jappaı tóbeles kezinde qaza tapqan Sherzat Bolattyń úıiniń órtenýine baılanysty Bas prokýratýra málimdeme jasaǵan bolatyn. 

Bas prokýratýranyń baspasóz qyzmetiniń málimetinshe, Talǵarda jasóspirimdi óltirý isi boıynsha jábirlenýshilerdiń úıin órteý faktisine qatysty 2024 jylǵy 12 qazanda Bas prokýratýranyń basshylyǵymen qylmysty ashý úshin vedomstvoaralyq jedel-tergeý toby quryldy.

Kinálilerdi áshkereleý úshin barlyq sharalar qabyldanatyn bolady. Qylmystyq is Qazaqstan Respýblıkasy Bas Prokýrorynyń baqylaýyna alyndy.

Aıta keteıik, 12 qazanǵa qaraǵan túni Talǵar tragedıasynda qaza tapqan Sherzat Bolattyń úıi órtenip ketti. Bul týraly áleýmettik jelide habarlana bastady. 

Zardap shekkender men qaza tapqandar joq. Kýágerlerdiń sózinshe, úı tutas órtenip ketken.

Bul derekke Polısıa departamenti jaýap berdi. 12 qazanǵa qaraǵan túni Eńbekshiqazaq aýdany Azat aýylyndaǵy úılerdiń birinde órt boldy.

Bótenniń múlkin qasaqana joıý deregi boıynsha polısıa qylmystyq is qozǵady. 

Tergeý aıasynda kýágerlerden jaýap alynyp jatyr, sondaı-aq beınebaqylaý kameralarynyń jazbalary zerttelip jatyr.