Premer-mınıstr Oljas Bektenov monoqalalardy damytý máseleleri boıynsha respýblıkalyq keńeste turaqty damýdyń negizgi sharty jumys oryndaryn qurý jáne kásipkerler men ınvestorlar úshin qolaıly jaǵdaı jasaý ekenine toqtaldy, dep habarlaıdy Dalanews.kz.
"Eń basty másele – monoqalalarǵa ınvestorlar tartý. Biz, árıne, árbir qalada aýrýhana, mektep, stadıon jáne basqa da áleýmettik nysandar sala alamyz, biraq jumys bolmasa, eshkim ol jaqta turmaıdy. Sondyqtan ınvestorlar tartýymyz kerek, olarǵa qajetti jaǵdaı jasaý qajet. Olarǵa bos turǵan ǵımarattardy, jer telimderin usynyp, jańa kásiporyndar ashýǵa jaǵdaı jasaý kerek. Eger mundaı tásil bolmasa, onda eshqandaı damý bolmaıdy. Sondyqtan eń basty másele – ınvestorlar tartý. Biz qazir Saran, Ekibastuz jáne basqa qalalarda nátıjeler bar ekenin kórip otyrmyz, biraq bul baǵytta belsendirek jumys isteý kerek", - dep atap ótti Oljas Bektenov.
Bul rette bıznesti qoldaý júıesinde jergilikti deńgeıde qosymsha quraldardy qoldaný mańyzdy. Atap aıtqanda, áleýmettik-kásipkerlik korporasıalardyń (ÁKK) jumysynyń mańyzdylyǵy jáne olardyń eksportqa baǵyttalǵan bastamalardy júzege asyrýǵa qatysýyn qamtamasyz etý qajettigi atap ótildi.
Júıeli transformasıany qamtamasyz etý úshin premer-mınıstr birqatar naqty tapsyrma berdi.
Osy jyldyń 1 jeltoqsanyna deıin Qaraǵandy jáne Atyraý oblystarynyń ákimdikteri Balqash jáne Qulsary qalalarynda ındýstrıalyq aımaqtar qurý boıynsha jumysty jedeldetýge tıis, Ulytaý jáne Aqtóbe oblystarynyń ákimdikteri Sátbaev pen Hromtaý qalalaryndaǵy ındýstrıalyq aımaqtardy iske qosý boıynsha jumysty kúsheıtýi qajet.
Oblys ákimdikteriniń aldyna Ónerkásip jáne qurylys mınıstrligimen birlesip, bıylǵy 1 qazanǵa deıin monoqalalarda shaǵyn ónerkásiptik aımaqtar baǵdarlamasyn iske asyrý úshin daıyn óndiristik alańdardy aıqyndaý mindeti qoıyldy.
"Samuryq-Qazyna" qory men "Báıterek" holdıńine oblys ákimdikterimen birlesip, 1 jeltoqsanǵa deıin monoqalalarda, onyń ishinde "Energetıkalyq jáne komýnaldyq sektorlardy jańǵyrtý" ulttyq jobasyn júzege asyrý sheńberinde uzaqmerzimdi sharttar men ofteık-kelisimsharttardy keńinen taratýdy qamtamasyz etý tapsyryldy.
Ulttyq ekonomıka, Sıfrlyq damý, Aýyl sharýashylyǵy, Týrızm jáne sport, Ǵylym jáne joǵary bilim mınıstrlikteri men oblys ákimdikteri bıylǵy 1 jeltoqsanǵa deıin naqty ınvestısıalyq jobalardy eskere otyryp, monoqalalardaǵy ekonomıka ósiminń jańa draıverlerin aıqyndaý boıynsha sharalar ázirleýi qajet. Ǵylym jáne joǵary bilim mınıstrligi ákimdiktermen birlesip, bıylǵy 1 qazanǵa deıin monoqalalardaǵy tehnıkalyq mamandar tapshylyǵyn azaıtý máselesin pysyqtaýy kerek.
Sondaı-aq, Kólik mınıstrligine óńir ákimdikterimen jáne "QazAvtoJol" UK" AQ-men birlesip, bıylǵy 1 qazanǵa deıin iri kólik dálizderiniń boıynda ornalasqan monoqalalardaǵy servıstik qyzmetti damytý jóninde usynystar engizý tapsyryldy.
