پرەمەر-مينيستر ولجاس بەكتەنوۆ مونوقالالاردى دامىتۋ ماسەلەلەرى بويىنشا رەسپۋبليكالىق كەڭەستە تۇراقتى دامۋدىڭ نەگىزگى شارتى جۇمىس ورىندارىن قۇرۋ جانە كاسىپكەرلەر مەن ينۆەستورلار ءۇشىن قولايلى جاعداي جاساۋ ەكەنىنە توقتالدى، دەپ حابارلايدى Dalanews.kz.

"ەڭ باستى ماسەلە – مونوقالالارعا ينۆەستورلار تارتۋ. ءبىز، ارينە، ءاربىر قالادا اۋرۋحانا، مەكتەپ، ستاديون جانە باسقا دا الەۋمەتتىك نىساندار سالا الامىز، ءبىراق جۇمىس بولماسا، ەشكىم ول جاقتا تۇرمايدى. سوندىقتان ينۆەستورلار تارتۋىمىز كەرەك، ولارعا قاجەتتى جاعداي جاساۋ قاجەت. ولارعا بوس تۇرعان عيماراتتاردى، جەر تەلىمدەرىن ۇسىنىپ، جاڭا كاسىپورىندار اشۋعا جاعداي جاساۋ كەرەك. ەگەر مۇنداي ءتاسىل بولماسا، وندا ەشقانداي دامۋ بولمايدى. سوندىقتان ەڭ باستى ماسەلە – ينۆەستورلار تارتۋ. ءبىز ءقازىر ساران، ەكىباستۇز جانە باسقا قالالاردا ناتيجەلەر بار ەكەنىن كورىپ وتىرمىز، ءبىراق بۇل باعىتتا بەلسەندىرەك جۇمىس ىستەۋ كەرەك"، - دەپ اتاپ ءوتتى ولجاس بەكتەنوۆ.

بۇل رەتتە بيزنەستى قولداۋ جۇيەسىندە جەرگىلىكتى دەڭگەيدە قوسىمشا قۇرالداردى قولدانۋ ماڭىزدى. اتاپ ايتقاندا، الەۋمەتتىك-كاسىپكەرلىك كورپوراسيالاردىڭ (اكك) جۇمىسىنىڭ ماڭىزدىلىعى جانە ولاردىڭ ەكسپورتقا باعىتتالعان باستامالاردى جۇزەگە اسىرۋعا قاتىسۋىن قامتاماسىز ەتۋ قاجەتتىگى اتاپ ءوتىلدى.

جۇيەلى ترانسفورماسيانى قامتاماسىز ەتۋ ءۇشىن پرەمەر-مينيستر ءبىرقاتار ناقتى تاپسىرما بەردى.

وسى جىلدىڭ 1 جەلتوقسانىنا دەيىن قاراعاندى جانە اتىراۋ وبلىستارىنىڭ اكىمدىكتەرى بالقاش جانە قۇلسارى قالالارىندا يندۋستريالىق ايماقتار قۇرۋ بويىنشا جۇمىستى جەدەلدەتۋگە ءتيىس، ۇلىتاۋ جانە اقتوبە وبلىستارىنىڭ اكىمدىكتەرى ساتبايەۆ پەن حرومتاۋ قالالارىنداعى يندۋستريالىق ايماقتاردى ىسكە قوسۋ بويىنشا جۇمىستى كۇشەيتۋى قاجەت.

وبلىس اكىمدىكتەرىنىڭ الدىنا ونەركاسىپ جانە قۇرىلىس مينيسترلىگىمەن بىرلەسىپ، بيىلعى 1 قازانعا دەيىن مونوقالالاردا شاعىن ونەركاسىپتىك ايماقتار باعدارلاماسىن ىسكە اسىرۋ ءۇشىن دايىن وندىرىستىك الاڭداردى ايقىنداۋ مىندەتى قويىلدى.

"سامۇرىق-قازىنا" قورى مەن "بايتەرەك" حولدينگىنە وبلىس اكىمدىكتەرىمەن بىرلەسىپ، 1 جەلتوقسانعا دەيىن مونوقالالاردا، ونىڭ ىشىندە "ەنەرگەتيكالىق جانە كوممۋنالدىق سەكتورلاردى جاڭعىرتۋ" ۇلتتىق جوباسىن جۇزەگە اسىرۋ شەڭبەرىندە ۇزاقمەرزىمدى شارتتار مەن وفتەيك-كەلىسىمشارتتاردى كەڭىنەن تاراتۋدى قامتاماسىز ەتۋ تاپسىرىلدى.

ۇلتتىق ەكونوميكا، سيفرلىق دامۋ، اۋىل شارۋاشىلىعى، تۋريزم جانە سپورت، عىلىم جانە جوعارى ءبىلىم مينيسترلىكتەرى مەن وبلىس اكىمدىكتەرى بيىلعى 1 جەلتوقسانعا دەيىن ناقتى ينۆەستيسيالىق جوبالاردى ەسكەرە وتىرىپ، مونوقالالارداعى ەكونوميكا ءوسىمىنڭ جاڭا درايۆەرلەرىن ايقىنداۋ بويىنشا شارالار ازىرلەۋى قاجەت. عىلىم جانە جوعارى ءبىلىم مينيسترلىگى اكىمدىكتەرمەن بىرلەسىپ، بيىلعى 1 قازانعا دەيىن مونوقالالارداعى تەحنيكالىق ماماندار تاپشىلىعىن ازايتۋ ماسەلەسىن پىسىقتاۋى كەرەك.

سونداي-اق، كولىك مينيسترلىگىنە ءوڭىر اكىمدىكتەرىمەن جانە "قازاۆتوجول" ۇك" اق-مەن بىرلەسىپ، بيىلعى 1 قازانعا دەيىن ءىرى كولىك دالىزدەرىنىڭ بويىندا ورنالاسقان مونوقالالارداعى سەرۆيستىك قىزمەتتى دامىتۋ جونىندە ۇسىنىستار ەنگىزۋ تاپسىرىلدى.