Depýtat Ulasbek Sádibekov búgingi Májilis palatasynyń jalpy otyrysynda memlekettik qaryzǵa kórsetiletin qyzmet shyǵyndarynyń qymbattai túsýine bailanysty óz alańdaýshylyǵyn bildirdi, dep habarlaidy Dalanews.kz.
Ol 2025 jyldyń basynda memlekettik qaryz 31,8 trln teńgeni nemese JIÓ-niń 23,5% -yn quraǵanyn eske saldy. Al onyń 30,1 trln teńgesi - úkimettik qaryz.
"Memlekettik qaryzǵa qyzmet kórsetý jaǵdaiy eleýli alańdaýshylyq týǵyzady. 2024 jyly qaryzdy óteý jáne oǵan kórsetiletin qyzmet shyǵystary 5,6 trln teńgeni qurady, iaǵni bul - biýdjettiń barlyq shyǵystarynyń 41,6%-y. 2023 jyly bul kórsetkish 28,3% deńgeiinde bolǵan. Bul alańdatarlyq dinamika: qaryz neǵurlym kóp bolsa, eldiń damýyna, infraqurylymǵa jáne adamdarǵa bólinýi tiis soǵurlym az qarajat qalady", - dedi Ulasbek Sádibekov.
Bul rette Májilis depýtaty Tatiana Saveleva da bylai pikir bildire otyryp, qamshyny basa tústi:
"Sońǵy jyldary Joǵary aýditorlyq palata memlekettik qaryzdy basqarýdaǵy júieli problemalardy únemi tirkep keledi. Osy kúnge deiin aqshany qaitarýǵa, valiýtalyq táýekelder men balansqa júrgizilgen saýatty bir de bir saraptama joq. Bul jaǵdai alda da qaitalanbaityndyǵyna qazir eshkim kepildik berip otyrǵan joq".
Bul rette Qarjy ministri Mádi Tákiev memlekettik qaryz "basqarýǵa" keletinin, normativti baza boiynsha jumystar jasalyp jatqanyn ǵana aitty. Al tolyqqandy esep-qisapty ol kelesi joly Májiliske ózimen birge ala kelýge ýáde berdi.
Aita ketsek, Joǵary aýditorlyq palata kvazimemlekettik sektordaǵy kompaniialar jumysynan birqatar buzýshylyqtardy anyqtady. Atap aitqanda, "Samuryq-Qazyna" qory men "Báiterek" holdinginen. Bul týraly búgin, 2025 jyly 18 maýsymda Májiliste Joǵary aýditorlyq palatanyń 2024 jylǵy respýblikalyq biýdjettiń oryndalýy týraly Úkimetke bergen esebiniń qorytyndysyn qaraý kezinde belgili boldy.
