دەپۋتات ۇلاسبەك سادىبەكوۆ بۇگىنگى ءماجىلىس پالاتاسىنىڭ جالپى وتىرىسىندا مەملەكەتتىك قارىزعا كورسەتىلەتىن قىزمەت شىعىندارىنىڭ قىمباتتاي تۇسۋىنە بايلانىستى ءوز الاڭداۋشىلىعىن ءبىلدىردى، دەپ حابارلايدى Dalanews.kz.
ول 2025 جىلدىڭ باسىندا مەملەكەتتىك قارىز 31،8 ترلن تەڭگەنى نەمەسە ءجىو-نىڭ 23،5% -ىن قۇراعانىن ەسكە سالدى. ال ونىڭ 30،1 ترلن تەڭگەسى - ۇكىمەتتىك قارىز.
"مەملەكەتتىك قارىزعا قىزمەت كورسەتۋ جاعدايى ەلەۋلى الاڭداۋشىلىق تۋعىزادى. 2024 جىلى قارىزدى وتەۋ جانە وعان كورسەتىلەتىن قىزمەت شىعىستارى 5،6 ترلن تەڭگەنى قۇرادى، ياعني بۇل - بيۋدجەتتىڭ بارلىق شىعىستارىنىڭ 41،6%-ى. 2023 جىلى بۇل كورسەتكىش 28،3% دەڭگەيىندە بولعان. بۇل الاڭداتارلىق ديناميكا: قارىز نەعۇرلىم كوپ بولسا، ەلدىڭ دامۋىنا، ينفراقۇرىلىمعا جانە ادامدارعا ءبولىنۋى ءتيىس سوعۇرلىم از قاراجات قالادى"، - دەدى ۇلاسبەك سادىبەكوۆ.
بۇل رەتتە ءماجىلىس دەپۋتاتى تاتيانا ساۆەليەۆا دا بىلاي پىكىر بىلدىرە وتىرىپ، قامشىنى باسا ءتۇستى:
"سوڭعى جىلدارى جوعارى اۋديتورلىق پالاتا مەملەكەتتىك قارىزدى باسقارۋداعى جۇيەلى پروبلەمالاردى ۇنەمى تىركەپ كەلەدى. وسى كۇنگە دەيىن اقشانى قايتارۋعا، ۆاليۋتالىق تاۋەكەلدەر مەن بالانسقا جۇرگىزىلگەن ساۋاتتى ءبىر دە ءبىر ساراپتاما جوق. بۇل جاعداي الدا دا قايتالانبايتىندىعىنا ءقازىر ەشكىم كەپىلدىك بەرىپ وتىرعان جوق".
بۇل رەتتە قارجى ءمينيسترى ءمادي تاكييەۆ مەملەكەتتىك قارىز "باسقارۋعا" كەلەتىنىن، ءنورماتيۆتى بازا بويىنشا جۇمىستار جاسالىپ جاتقانىن عانا ايتتى. ال تولىققاندى ەسەپ-قيساپتى ول كەلەسى جولى ماجىلىسكە وزىمەن بىرگە الا كەلۋگە ۋادە بەردى.
ايتا كەتسەك، جوعارى اۋديتورلىق پالاتا كۆازيمەملەكەتتىك سەكتورداعى كومپانيالار جۇمىسىنان ءبىرقاتار بۇزۋشىلىقتاردى انىقتادى. اتاپ ايتقاندا، "سامۇرىق-قازىنا" قورى مەن "بايتەرەك" حولدينگىنەن. بۇل تۋرالى بۇگىن، 2025 جىلى 18 ماۋسىمدا ماجىلىستە جوعارى اۋديتورلىق پالاتانىڭ 2024 جىلعى رەسپۋبليكالىق بيۋدجەتتىڭ ورىندالۋى تۋرالى ۇكىمەتكە بەرگەن ەسەبىنىڭ قورىتىندىسىن قاراۋ كەزىندە بەلگىلى بولدى.
