Premer-mınıstr Oljas Bektenovtiń tóraǵalyǵymen ótken monoqalalardy damytý jónindegi keńeste ulttyq ekonomıka vıse-mınıstri Baýyrjan Omarbekov monoqalalardyń elimizdiń ónerkásip óndirisine qosar úlesi zor ekenin baıandady, dep habarlaıdy Dalanews.kz.
2024 jyldyń qorytyndysy boıynsha olardyń úlesi jalpy kólemniń 36,4%-yn qurady.
"2024 jyldyń qorytyndysy boıynsha monoqalalardaǵy ónerkásip óndirisi kólemi 18,2 trln teńgeni qurady, al 2023 jyldyń uqsas kezeńimen salystyrǵanda bul kórsetkish 3,4%-ǵa artty. 2024 jyldyń qorytyndysy boıynsha negizgi kapıtalǵa salynǵan ınvestısıa kólemi 2 trln teńgeni qurap, 2023 jyldyń sáıkes kezeńimen salystyrǵanda 17,4%-ǵa artty", - dedi Baýyrjan Omarbekov.Qazirgi tańda elimizde 1,4 mln turǵyny bar 20 monoqala bar. Onda 18 qala quraýshy kásiporyn jumys isteıdi, olardyń jumysy aýmaqtardyń áleýmettik-ekonomıkalyq damýyna tikeleı áser etedi.
Kásporyndar negizinen taý-ken, metalýrgıa jáne energetıka salalaryna negizdelgen.
