2025 jylǵy 18 maýsymda Soltústik Qazaqstan oblystyq sotynyń qylmystyq ister jónindegi sot alqasy 1990 jyly týǵan, QK-niń 174-babynyń 1-bóligimen, iaǵni ultaralyq alaýyzdyqty qozdyrý faktisi boiynsha sottalǵan J.Darhambaevaǵa qatysty qylmystyq isti apelliatsiialyq tártipte qarady.
Anyqtalǵandai, J.Darhambaeva óziniń jeke paraqshasyna ártúrli etnostar ókilderiniń ar-namysy men qadir-qasietin jariia túrde qorlaýǵa baǵyttalǵan sózderdi qoldanǵan beinejariialanymdy salǵan.
J.Darhambaevanyń úndeýi Internet qoldanýshylarynyń keń aýqymyn qamtyǵan – quqyqqa qaishy beinejazbalar jarty millionnan astam tirkelýshileri bar messendjerlerde jariialanǵan.
Mundai áreketter bizdiń memleketimizdiń irgetasy bolyp tabylatyn ultaralyq kelisimdi jáne halyqtyń birligin buzýǵa, oǵan nuqsan keltirýge baǵyttalǵan. Konstitýtsiia ulttyq, násildik jáne dini ýáji boiynsha kez kelgen kemsitýshilikke tyiym salady.
Bul rette, zańda osy siiaqty ekstremistik qylmystar úshin jaza kózdelgen. Zań men sot aldynda, olardyń jynysy, jasy jáne áleýmettik mártebesine qaramastan barlyǵy teń bolyp keledi.
J.Darhambaeva qylmysty sanaly túrde, eresek ári jetilgen adam bola tura jasaǵan. Ol óziniń áreketteri basqa azamattardyń quqyqtaryn buzatynyn bilgen.
Sot barlyq dáleldemelerdi zerdelep, J.Darhambaevanyń kinási tolyq dáleldengen dep esepteidi.
Osylaisha, birinshi satydaǵy sot zańdy ári negizdi sheshim qabyldaǵan.
Degenmen, sotqa túsken meditsinalyq qorytyndyǵa sáikes, qazirgi ýaqytta ol Petropavl q. oblystyq perinataldyq ortalyǵynda bosanǵannan keiin jasalǵan otaǵa bailanysty densaýlyǵynyń nasharlaýy sebebinen em sharalaryn qabyldaýdy qajet etedi.
Sottalǵannyń ózi apelliatsiialyq satydaǵy sotta kinásin tolyq moiyndady, jasaǵan is-áreketterine ókinetinin aityp, bosanýyna jáne densaýlyq jaǵdaiyna bailanysty oǵan jazany óteýin keiinge qaldyrýdy surady.
Atalǵandardyń negizinde, usynylǵan málimetter men jańa mán-jailardy eskere otyryp, apelliatsiialyq saty J. Darhambaevaǵa qatysty 2 jyl merzimge jazasyn óteýdi keiinge qaldyrýdy qoldanýǵa sheshim qabyldady, iaǵni onyń jazasyn óteýi ýaqytsha keiinge qaldyrylatyn bolady.
Alaida, J.Darhambaeva qaita quqyq buzýshylyq jasaǵan jaǵdaida, Qazaqstan Respýblikasynyń zańnamasyna sáikes, jazasyn óteýdi keiinge qaldyrýdy qoldanýdyń kúshi joiylady.
