2025 جىلعى 18 ماۋسىمدا سولتۇستىك قازاقستان وبلىستىق سوتىنىڭ قىلمىستىق ىستەر جونىندەگى سوت القاسى 1990 جىلى تۋعان، قك-نىڭ 174-بابىنىڭ 1-بولىگىمەن، ياعني ۇلتارالىق الاۋىزدىقتى قوزدىرۋ فاكتىسى بويىنشا سوتتالعان ج.دارحامبايەۆاعا قاتىستى قىلمىستىق ءىستى اپەللياسيالىق تارتىپتە قارادى.

انىقتالعانداي، ج.دارحامبايەۆا ءوزىنىڭ جەكە پاراقشاسىنا ءارتۇرلى ەتنوستار وكىلدەرىنىڭ ار-نامىسى مەن قادىر-قاسيەتىن جاريا تۇردە قورلاۋعا باعىتتالعان سوزدەردى قولدانعان بەينەجاريالانىمدى سالعان.

ج.دارحامبايەۆانىڭ ۇندەۋى ينتەرنەت قولدانۋشىلارىنىڭ كەڭ اۋقىمىن قامتىعان – قۇقىققا قايشى بەينەجازبالار جارتى ميلليوننان استام تىركەلۋشىلەرى بار مەسسەندجەرلەردە جاريالانعان.

مۇنداي ارەكەتتەر ءبىزدىڭ مەملەكەتىمىزدىڭ ىرگەتاسى بولىپ تابىلاتىن ۇلتارالىق كەلىسىمدى جانە حالىقتىڭ بىرلىگىن بۇزۋعا، وعان نۇقسان كەلتىرۋگە باعىتتالعان. كونستيتۋسيا ۇلتتىق، ناسىلدىك جانە ءدىني ءۋاجى بويىنشا كەز كەلگەن كەمسىتۋشىلىككە تىيىم سالادى.

بۇل رەتتە، زاڭدا وسى سياقتى ەكسترەميستىك قىلمىستار ءۇشىن جازا كوزدەلگەن. زاڭ مەن سوت الدىندا، ولاردىڭ جىنىسى، جاسى جانە الەۋمەتتىك مارتەبەسىنە قاراماستان بارلىعى تەڭ بولىپ كەلەدى.

ج.دارحامبايەۆا قىلمىستى سانالى تۇردە، ەرەسەك ءارى جەتىلگەن ادام بولا تۇرا جاساعان. ول ءوزىنىڭ ارەكەتتەرى باسقا ازاماتتاردىڭ قۇقىقتارىن بۇزاتىنىن بىلگەن.

سوت بارلىق دالەلدەمەلەردى زەردەلەپ، ج.دارحامبايەۆانىڭ كىناسى تولىق دالەلدەنگەن دەپ ەسەپتەيدى.

وسىلايشا، ءبىرىنشى ساتىداعى سوت زاڭدى ءارى نەگىزدى شەشىم قابىلداعان.

دەگەنمەن، سوتقا تۇسكەن مەديسينالىق قورىتىندىعا سايكەس، قازىرگى ۋاقىتتا ول پەتروپاۆل ق. وبلىستىق پەريناتالدىق ورتالىعىندا بوسانعاننان كەيىن جاسالعان وتاعا بايلانىستى دەنساۋلىعىنىڭ ناشارلاۋى سەبەبىنەن ەم شارالارىن قابىلداۋدى قاجەت ەتەدى.

سوتتالعاننىڭ ءوزى اپەللياسيالىق ساتىداعى سوتتا كىناسىن تولىق مويىندادى، جاساعان ىس-ارەكەتتەرىنە وكىنەتىنىن ايتىپ، بوسانۋىنا جانە دەنساۋلىق جاعدايىنا بايلانىستى وعان جازانى وتەۋىن كەيىنگە قالدىرۋدى سۇرادى.

اتالعانداردىڭ نەگىزىندە، ۇسىنىلعان مالىمەتتەر مەن جاڭا ءمان-جايلاردى ەسكەرە وتىرىپ، اپەللياسيالىق ساتى ج. دارحامبايەۆاعا قاتىستى 2 جىل مەرزىمگە جازاسىن وتەۋدى كەيىنگە قالدىرۋدى قولدانۋعا شەشىم قابىلدادى، ياعني ونىڭ جازاسىن وتەۋى ۋاقىتشا كەيىنگە قالدىرىلاتىن بولادى.

الايدا، ج.دارحامبايەۆا قايتا قۇقىق بۇزۋشىلىق جاساعان جاعدايدا، قازاقستان رەسپۋبليكاسىنىڭ زاڭناماسىنا سايكەس، جازاسىن وتەۋدى كەيىنگە قالدىرۋدى قولدانۋدىڭ كۇشى جويىلادى.