Qazaqstandyqtar ózge túgili bazalyq azyq-túlik ónimderin qaryzǵa satyp alýǵa májbúr. Memlekettiń ekonomikalyq saiasatyna qatysty ýaqyt ótken saiyn kóptegen suraqtar týyndaýda. Halyqty naqty qoldaýdyń ornyna baǵalar ósip jatyr, al sórelerde otandyq taýarlardyń ornyn importtyqtar basýda. Tipti, biz kartoppen óz-ózimizdi qamtamasyz ete almaidy ekenbiz. Májiliste azyq-túlik qaýipsizdigi máselesin osylaisha kótergen Májilis depýtaty Ashat Rahymjanov Úkimetke eń tómengi kúnkóris deńgeii, eń tómengi jalaqy, azyq-túlik sebeti syndy bazalyq áleýmettik kórsetkishterdi qaita qarastyrýdy usyndy, dep habarlaidy Dalanews.kz.
"Ózderińizge belgili, alma baqtaryn salýǵa qansha milliard qarajat jumsalǵany, biraq búginderi sýpermarket sórelerindegi taýarlarǵa kóz salsaq, biz poliaktyń jáne qytaidyń almalaryn kóremiz. Al Qazaqstan ónimin kezdestirsek, nege ekeni belgisiz, olardyń baǵasy importtan áldeqaida joǵary bolyp jatady. Almany qoishy, biz ózimizdi kartoppen de qamtamasyz ete almaidy ekenbiz, búginderi tutynýshylarǵa Qytaidyń kartoby usynylyp júr", - dedi Ashat Rahymjanov Májilistiń jalpy otyrysynda.
Depýtat bazalyq áleýmettik kórsetkishterdi qaita qaraýdy usyndy: eń tómengi kúnkóris deńgeii, eń tómengi jalaqy jáne tutynýshylyq qorjynyń quramyn. Onyń pikirinshe, qazirgi azyq-túlik sebeti halyqaralyq, sol sekildi ulttyq tamaqtaný standarttaryna da sáikes kelmeidi, saldarynan halyqtyń densaýlyǵyna orasan zalal kelip jatyr.
"Bizdiń azyq-túlik sebebi halyqaralyq standarttarǵa, sondai-aq Qazaqstan halqynyń mádeni jáne dástúrli ratsionyna da jaýap bere almaidy jáne azamattarymyzdyń densaýlyǵyna qaýip tóndiredi. JSDP partiiasy Úkimet aiqyndaǵan eń tómengi azyq-túlik ónimderin negizge ala otyryp, ai saiyn respýblika boiynsha baǵalarǵa monitoring júrgizedi. Ol úshin ortasha qazaqstandyq otbasyna keminde 70 myń teńge qajet eken, bul tek eń qajetti tamaq ónimderine ǵana qatysty. Tiisinshe, eń tómengi kúnkóris deńgeii 115 710 teńge bolýy tiis", - dep esepteidi depýtat.
Sheneýnikterge únem jasap, ómir súrýge úndeý jasaldy. Biraq, ázirge bul qarapaiym qazaqstandyqtar ǵana qatysty jumys isteýde. Infliatsiia ósýde. Azyq-túlik, janar-jaǵarmai, kommýnaldyq qyzmetter toqtaýsyz qymbattap jatyr.
"Óspei jatqan tek bir nárse bar. Ol - biýdjet qarajatyn bólý kezindegi memlekettik organdardyń halyq aldyndaǵy ashyqtyǵy men esep berý deńgeii. Bul halyqtyń júrgizilip jatqan reformalarǵa degen senimin jáne biýdjet qarajatyn jumsaýdyń tiimdiligin arttyrýǵa qatysty azamattyq qoǵamnyń talap etetin basty sharty", - dep sanaidy depýtat.
Buǵan deiin mamyr aiynda elimizde jyldyq infliatsiia jedeldep, 11,3% bolǵany (sáýirde – 10,7%), jyldyq infliatsiia 16 óńirde jedeldegeni habarlanǵan. Sondai-aq bizdiń saitymyzda "Bizdiń jep júrgenimiz - Qytaidyń kartoby". Qazaqstandiki nege qorlarda tyǵýly jatady?" degen maqala jariialanǵan bolatyn.
