Oljas Bektenov monoqalalardy damytý máseleleri boıynsha respýblıkalyq keńes ótkizdi, dep habarlaıdy Dalanews.kz.
Qaraǵandy oblysyna jumys sapary barysynda premer-mınıstr Oljas Bektenovtiń tóraǵalyǵymen "Monoqalalardyń bolashaǵy: oń tájirıbe jáne turaqty damý" atty respýblıkalyq semınar-keńes ótti. Jıynǵa óńirler men monoqalalardyń ákimderi, sondaı-aq, ónerkásip kásiporyndarynyń basshylary jáne sarapshylar qoǵamdastyǵynyń ókilderi qatysty. Prezıdenttiń tapsyrmasyn eskere otyryp, monoqalalardy damytýdyń jańa tásilderi qaraldy.
Ulttyq ekonomıka vıse-mınıstri Baýyrjan Omarbekov, ónerkásip jáne qurylys vıse-mınıstri Oljas Saparbekov, Qaraǵandy oblysynyń ákimi Ermaǵanbet Bólekpaev, Ekibastuz qalasynyń ákimi Aıan Beısekınniń baıandamalary tyńdaldy.
Qazirgi ýaqytta elimizde shamamen 1,5 mln adam turatyn 20 monoqala bar. Ulttyq ekonomıka mınıstrliginiń derekteri boıynsha olardyń úlesine ónerkásip óndirisi kóleminiń úshten birinen astamy tıesili, 2024 jyldyń qorytyndysy boıynsha bul kórsetkish 36,4%-dy qurady.
Memleket basshysynyń 2024 jylǵy Qazaqstan halqyna joldaýyndaǵy monoqalalardyń ekonomıkasyn ártaraptandyrý jónindegi tapsyrmasyn júzege asyrý sheńberinde 78 kórsetkish negizinde áleýmettik-ekonomıkalyq damýǵa taldaý júrgizildi. Indýstrıaldy aımaqty qurý, jeńildikpen nesıeleý jáne basqa da jumystardyń nátıjesinde monoqala mártebesinen shyqqan Saran qalasynyń oń tájirıbesi eskerildi. Nátıjesinde monoqalalar úsh topqa jikteldi, olardyń árqaısysy úshin basym sharalar aıqyndaldy. Olardyń qatarynda ınjenerlik jáne áleýmettik ınfraqurylymdy jańǵyrtý, órkendeýdiń jańa baǵyttaryn anyqtaý, IT, AÓK, týrızm jáne ǵylym salalarynyndaǵy ınvestısıalyq jobalardy iske asyrý, kólik dálizderi boıyndaǵy servıstik qyzmetti damytý, ındýstrıalyq jáne shaǵyn ónerkásiptik aımaqtar qalyptastyrý sharalary bar. Jańa óndiristik qýatty ornyqty júkteýge baǵyttalǵan otandyq óndirýshilermen uzaqmerzimdi kelisimsharttar men ofteık-kelisimder tetigin odan ári damytýǵa jáne qoldanýǵa erekshe nazar aýdaryldy.
Premer-mınıstr Ekibastuz qalasy ekonomıkasyn kóterýdiń jáne ártaraptandyrýdyń ornyqty serpinin atap ótti. Bul rette 800-den asa jumys ornyn asha otyryp, quny 138,4 mlrd teńge bolatyn feroqorytpa zaýytyn salý jobasyn iske qosý, sondaı-aq, ındýstrıalyq aımaq qalyptastyrý mańyzdy ról atqardy.
"Monoqalalar "ósýge yqpal ete alatyn" aımaqtarǵa aınala alady. Biz buǵan "jasyl" tehnologıalar men sıfrly ınfraqurylymnyń nemese kreatıvti ekonomıkanyń damý múmkindikteri retinde qaraýymyz kerek. Bolashaq ındýstrıasy osyndaı shaǵyn qalalarda bastaý alýy kerek. Monoqalalardyń ekonomıkasyn ártaraptandyrýǵa basa nazar aýdarý qajet. Bul olardyń ekonomıkasyn kóterýge jáne monoqalalar qatarynan shyǵýyna múmkindik beredi. Mysaly, qazirgi ýaqytta Ekibastuz ekonomıkalyq qurylymy ártúrli, kópsalaly qalaǵa aınalýda. Iaǵnı ol úshin monoqala mártebesi ózekti emes. Zamanaýı standarttarǵa sáıkes keletin jańa ınfraqurylymdyq saıasat qurý boıynsha jumysty kúsheıtý qajet", - dep atap ótti Oljas Bektenov.
