ولجاس بەكتەنوۆ مونوقالالاردى دامىتۋ ماسەلەلەرى بويىنشا رەسپۋبليكالىق كەڭەس وتكىزدى، دەپ حابارلايدى Dalanews.kz.
قاراعاندى وبلىسىنا جۇمىس ساپارى بارىسىندا پرەمەر-مينيستر ولجاس بەكتەنوۆتىڭ توراعالىعىمەن "مونوقالالاردىڭ بولاشاعى: وڭ تاجىريبە جانە تۇراقتى دامۋ" اتتى رەسپۋبليكالىق سەمينار-كەڭەس ءوتتى. جيىنعا وڭىرلەر مەن مونوقالالاردىڭ اكىمدەرى، سونداي-اق، ونەركاسىپ كاسىپورىندارىنىڭ باسشىلارى جانە ساراپشىلار قوعامداستىعىنىڭ وكىلدەرى قاتىستى. پرەزيدەنتتىڭ تاپسىرماسىن ەسكەرە وتىرىپ، مونوقالالاردى دامىتۋدىڭ جاڭا تاسىلدەرى قارالدى.
ۇلتتىق ەكونوميكا ۆيسە-مينيسترى باۋىرجان وماربەكوۆ، ونەركاسىپ جانە قۇرىلىس ۆيسە-مينيسترى ولجاس ساپاربەكوۆ، قاراعاندى وبلىسىنىڭ اكىمى ەرماعانبەت بولەكپايەۆ، ەكىباستۇز قالاسىنىڭ اكىمى ايان بەيسەكيننىڭ باياندامالارى تىڭدالدى.
قازىرگى ۋاقىتتا ەلىمىزدە شامامەن 1،5 ملن ادام تۇراتىن 20 مونوقالا بار. ۇلتتىق ەكونوميكا مينيسترلىگىنىڭ دەرەكتەرى بويىنشا ولاردىڭ ۇلەسىنە ونەركاسىپ ءوندىرىسى كولەمىنىڭ ۇشتەن بىرىنەن استامى تيەسىلى، 2024 جىلدىڭ قورىتىندىسى بويىنشا بۇل كورسەتكىش 36،4%-دى قۇرادى.
مەملەكەت باسشىسىنىڭ 2024 جىلعى قازاقستان حالقىنا جولداۋىنداعى مونوقالالاردىڭ ەكونوميكاسىن ءارتاراپتاندىرۋ جونىندەگى تاپسىرماسىن جۇزەگە اسىرۋ شەڭبەرىندە 78 كورسەتكىش نەگىزىندە الەۋمەتتىك-ەكونوميكالىق دامۋعا تالداۋ جۇرگىزىلدى. يندۋستريالدى ايماقتى قۇرۋ، جەڭىلدىكپەن نەسيەلەۋ جانە باسقا دا جۇمىستاردىڭ ناتيجەسىندە مونوقالا مارتەبەسىنەن شىققان ساران قالاسىنىڭ وڭ تاجىريبەسى ەسكەرىلدى. ناتيجەسىندە مونوقالالار ءۇش توپقا جىكتەلدى، ولاردىڭ ءارقايسىسى ءۇشىن باسىم شارالار ايقىندالدى. ولاردىڭ قاتارىندا ينجەنەرلىك جانە الەۋمەتتىك ينفراقۇرىلىمدى جاڭعىرتۋ، وركەندەۋدىڭ جاڭا باعىتتارىن انىقتاۋ، IT، اوك، تۋريزم جانە عىلىم سالالارىنىنداعى ينۆەستيسيالىق جوبالاردى ىسكە اسىرۋ، كولىك دالىزدەرى بويىنداعى سەرۆيستىك قىزمەتتى دامىتۋ، يندۋستريالىق جانە شاعىن ونەركاسىپتىك ايماقتار قالىپتاستىرۋ شارالارى بار. جاڭا وندىرىستىك قۋاتتى ورنىقتى جۇكتەۋگە باعىتتالعان وتاندىق وندىرۋشىلەرمەن ۇزاقمەرزىمدى كەلىسىمشارتتار مەن وفتەيك-كەلىسىمدەر تەتىگىن ودان ءارى دامىتۋعا جانە قولدانۋعا ەرەكشە نازار اۋدارىلدى.
پرەمەر-مينيستر ەكىباستۇز قالاسى ەكونوميكاسىن كوتەرۋدىڭ جانە ءارتاراپتاندىرۋدىڭ ورنىقتى سەرپىنىن اتاپ ءوتتى. بۇل رەتتە 800-دەن اسا جۇمىس ورنىن اشا وتىرىپ، قۇنى 138،4 ملرد تەڭگە بولاتىن فەرروقورىتپا زاۋىتىن سالۋ جوباسىن ىسكە قوسۋ، سونداي-اق، يندۋستريالىق ايماق قالىپتاستىرۋ ماڭىزدى ءرول اتقاردى.
"مونوقالالار "وسۋگە ىقپال ەتە الاتىن" ايماقتارعا اينالا الادى. ءبىز بۇعان "جاسىل" تەحنولوگيالار مەن سيفرلى ينفراقۇرىلىمنىڭ نەمەسە كرەاتيۆتى ەكونوميكانىڭ دامۋ مۇمكىندىكتەرى رەتىندە قاراۋىمىز كەرەك. بولاشاق يندۋسترياسى وسىنداي شاعىن قالالاردا باستاۋ الۋى كەرەك. مونوقالالاردىڭ ەكونوميكاسىن ءارتاراپتاندىرۋعا باسا نازار اۋدارۋ قاجەت. بۇل ولاردىڭ ەكونوميكاسىن كوتەرۋگە جانە مونوقالالار قاتارىنان شىعۋىنا مۇمكىندىك بەرەدى. مىسالى، قازىرگى ۋاقىتتا ەكىباستۇز ەكونوميكالىق قۇرىلىمى ءارتۇرلى، كوپسالالى قالاعا اينالۋدا. ياعني ول ءۇشىن مونوقالا مارتەبەسى وزەكتى ەمەس. زاماناۋي ستاندارتتارعا سايكەس كەلەتىن جاڭا ينفراقۇرىلىمدىق ساياسات قۇرۋ بويىنشا جۇمىستى كۇشەيتۋ قاجەت"، - دەپ اتاپ ءوتتى ولجاس بەكتەنوۆ.
