Úkimet aýyl sharýashylyǵy tehnikasy parkin jańartý maqsatynda (Aýyl sharýashylyǵy ministrligi arqyly) memlekettik qoldaýdyń keshendi sharalaryn belsendi túrde júzege asyrýda, dep habarlaidy Dalanews.kz.
Eń mańyzdy yntalandyrý – bul investitsiialyq sýbsidiialaý baǵdarlamasy, onyń aiasynda sharýalarǵa satyp alynǵan tehnika qunynyń 15%-dan 30%-ǵa deiingi bóligi óteledi (tehnikanyń basymdyq deńgeiine qarai). Qosymsha qoldaý retinde – syiaqy mólsherlemesin sýbsidiialaý júzege asyrylady: basym tehnika boiynsha 6%-ǵa deiin, al qalǵan túrleri boiynsha 15%-ǵa deiin. Sonymen qatar tehnikaǵa jeńildetilgen lizing baǵdarlamasy da qarqyndy damyp keledi, ol sharýalarǵa jyldyq 5% mólsherlememen tehnika alýǵa múmkindik beredi.
2025 jylǵy 1 qańtardaǵy jaǵdai boiynsha, respýblikamyzda 139 myń traktor, 31 myń kombain, 5,6 myń egis kesheni, 71 myń tuqym sepkish jáne 141 myń topyraq óńdeitin qural bar. 2024 jyly tehnika parkin jańartý deńgeii 5,5%-dy qurap, 2023 jylǵy kórsetkishten (4,5%) aitarlyqtai joǵary boldy. 2025 jylǵa arnalǵan mindet – jańartý deńgeiin 6,5%-ǵa deiin jetkizý. Jalpy alǵanda, aýyl sharýashylyǵy tehnikasy parkin tehnologiialyq turǵydan zamanaýi deńgeide ustaý úshin jańartý kórsetkishin 8-10%-ǵa deiin jetkizý qajet.
Ministrlik 2028 jylǵa deiin tehnika parkin jańartý deńgeiin 9%-ǵa jetkizýdi josparlap otyr.
Osyǵan bailanysty Memleket basshysynyń tapsyrmasy boiynsha aýyl sharýashylyǵy tehnikasynyń jeńildetilgen lizingi baǵdarlamasyn qarjylandyrý kólemin 450 mlrd teńgege deiin arttyrý josparlanǵan.
Búginde mashina-traktor parkin jańartýdy jedeldetý boiynsha qabyldanyp jatqan memlekettik qoldaý sharalary óz tiimdiligin kórsetip otyr. Bul oń serpindi sandar da rastaidy: eger 2017 jyly nebári 8,5 myń birlik tehnika satyp alynǵan bolsa, 2024 jyldyń qorytyndysy boiynsha olardyń sany 22,1 myń birlikke jetip, kórsetkish 2,5 esege artty.
Ásirese, "Jeńildetilgen lizing" baǵdarlamasy aiasyndaǵy ilgerileý aiqyn baiqalady: 2025 jyly atalǵan baǵdarlamaǵa keminde 250 mlrd teńge bólinip, shamamen 6 myń birlik tehnika satyp alynady. 24 aqpannan bastap – ótinimder qabyldaý bastalǵan kúnnen beri "QazAgroQarjy" AQ-ǵa 3555 ótinish kelip tústi, olardyń jalpy somasy – 129,2 mlrd teńge. Qazirdiń ózinde 2400 shart jasalyp, jalpy quny 85,7 mlrd teńge bolatyn 4580 birlik tehnika jetkizý josparlanǵan.
Zamanaýi egis keshenderi aǵymdaǵy egis naýqanyna da belsendi tartylǵan – 5,6 myń birlik tehnika dándi daqyldar egistiginiń 70%-ǵa deiingi aýmaǵyn qamtidy. Bul – John Deere, CLASS, RSM sekildi jetekshi jahandyq brendterdiń tehnikasy. Olar dál eginshiliktiń zamanaýi júielerimen jabdyqtalǵan: GPS, avtopilottar, tuqymdy, tyńaitqysh pen gerbitsidti dál sebý júieleri.
Egis jumystary úshin mańyzdy faktor – janar-jaǵarmai materialdarymen (JJM) úzdiksiz qamtamasyz etý. 2025 jyly egis jumystaryna 401 myń tonna dizel otyny bólindi. 2024 jyly – 376,4 myń tonna. Aýyl sharýashylyǵy óndirýshilerinen barlyǵy shamamen 17 myń ótinim kelip tústi. Baǵany retteý sharalarynyń arqasynda dizel otynynyń sońǵy baǵasy litrine 254 teńgeni qurady – bul naryqtyq baǵadan 15–20% tómen (AZS-te – 301-307 teńge/litr).
