Sonda balamnyń aıtqany: «Bir adamdy neshe ret úılendire berýge bolady? Ózim mundaıǵa jol bermeımin: týǵan kúnimde jasap, keshke deıin barlyǵyn bitiremin».
"Toı men qudalyqta otyryp bos ótkizgen ýaqytymyzdy aıaımyn", – deıdi bedeýlikti emdeý «Ekomed» klınıkalary jelisiniń jetekshisi Saltanat Baıqoshqarova. Bul týraly ol Dalanews.kz-ke bergen suhbatynda aıtty.
"Týystarymyzdyń úılený toıynyń shyǵysyn únemdeýdi, teatrlandyrylǵan qoıylym-kórinister qajettiliginiń joqtyǵyn túsindirýmen júrmin
Birde kórshimizdiń ulynyń úılenýi sharalaryna qatystyq. Jaqyn aralasatyn bolǵandyqtan, jubaıym ekeýimiz 7-8 ret eki jaqtyń quda túsý, qudalyq, syrǵa salý, uzatý toı, úlken toı, erteńine quda kútý kishi toılary syqyldy rásimderine qatysýmen qaladan-qalaǵa baryp, bir aptadan asa júrippiz.
Kishi ulym bolsa qaraýsyz qalǵany.
Sonda balamnyń aıtqany: «Bir adamdy neshe ret úılendire berýge bolady? Ózim mundaıǵa jol bermeımin: týǵan kúnimde jasap, keshke deıin barlyǵyn bitiremin».
Baıqasańyz, kishkentaı balalardyń ózderi de qazaq toıynyń rasıonaldy emesine kózderi jetti.
Sonsha áýre bolyp júrip úılendirgen jastarymyz 3 aı bolmaı minezderi kelispeı ajyrasyp ketti, sonda ishteı qynjyldym, balamdy qaraýsyz qaldyryp, bosqa ótken beker ýaqytymyzǵa", – deıdi ol.
Dalanews.kz-ke suhbat bergen Saltanat Baıqoshqarova qazaqta kóp bala týyp, keıin bir-ekeýine barlyq aýyrtpalyqty júktep qoıý daǵdysy qalyptasqanyn synǵa aldy.
"Qazaǵymyzda ádette otbasydaǵy onshaqty baladan jaramdysy – bireýi, ári ketse ekeý-úsheýi.
Sóıtip, olar ómir boıy baýyrlaryn tartýmen ótedi. Tanys jaǵdaı ma?
Tájirıbemde jasy ulǵaıǵan, úılenbegen, balasy joq biraz áıelder kezdesti. Jasy 40-45-ten asqan olar náresteli bolýǵa nıetti ekenin aıtty. Jastyq shaǵy qalaı ótti desek, ózinen kishi baýyrlarynyń jaǵdaıyn jasaýmen ýaqytty ótkizip alǵandaryn aıtady. Basqa mysal.
Klınıkalarymyzdyń birinde qyzmettegi 39 jastaǵy meıirbıkeniń jalǵyz uly bar.
Birde: «Klınıka múmkinshiligin paıdalanyp, taǵy bir bala týyp alsań qaıtedi», – dep edim, – «Men týyp alǵym-aq keledi, biraq kúıeýim 13 balanyń úlkeni, otbasylyq máselelerden ábden sharshaǵan», degen jaýap estidim.
«Óziń kótere qalsań, tý, qarsylyǵym joq. Bala týý úshin EKO jasaýǵa ádeıilep barmaısyń. Ulym baýyrlaryn prısep sekildi tartyp júrgenin qalamaımyn. 5-6 balany taýyp, taýyp, birin birine ilip qoıǵandy tek bizdiń qazaqtan kórdim», dep ashyq aıtqan eken".
Óz suhbatynda «Ekomed» klınıkasynyń basshysy kópbalaly otbasylardyń kóbeıýine qarsy emesin, alaıda otbasyn qurǵan jastarǵa balany aıaǵynan tik turǵyzyp jiberýge kóz jetkizip baryp ómirge ákelýine keńes beredi.
"Keıin balalaryńyz «Kedeılikke ushyratqandaryń qalaı?» dep júrmesin. Memleket eń qajetti nárselermen ǵana qamtıdy, qalǵany – ata-ananyń jaýapkershiliginde.
Meniń paıymdaýym boıynsha, adam urpaǵy úshin jaýapkershiliktiń 30 paıyzy memleket, qalǵan 70 paıyzy óz moıynynda bolýy tıis", – deıdi ol.
