Abaı ýnıversıteti Ulystyń uly kúni – Naýryz merekesin ulttyq rýhty jańǵyrtqan, mazmuny baı ári taǵylymy tereń daıyndyqpen, óte joǵary deńgeıde atap ótti.Muhtar Áýezov atyndaǵy ýnıversıtet stadıonynda kıiz úıler tigilip, án-kúı men jyrǵa kómkerilip, túrli ulttyq sport saıystary, defıle men jármeńke, kórme men oıyndar bolyp, ulyq meıramǵa myńdaǵan adam qatysty, dep habarlaıdy Dalanews.kz
Jańarý men jasampazdyq, meıirim men yntymaq sımvoly sanalatyn bul mereke – kún men tún teńelip, tabıǵat pen tirshiliktiń qaıta túleıtin aıryqsha mereıli shaǵy. Qazaqtyń tuńǵysh ýnıversıteti bıyl Ulystyń uly kúnin erekshe atap ótkenin aıta ketýmiz kerek.
Ýnıversıtet ujymy men stýdentteri bul meıramdy ashyq aspan astyndaǵy keń stadıondaetno-aýyl formatynda atap ótti. Sap túzegen aq shańqan kıiz úıler, býy burqyraǵan dám men ulttyq kıim kıgen qaýymnyń júzindegi qýanysh bul aýmaqty qazaqtyń baıyrǵy dástúri men zamanaýı jastyq jalyny toǵysqan úlken dýman oshaǵyna aınaldyrdy. Merekelik is-shara stýdentterdiń shyǵarmashylyq áleýetin kórsetýge, ulttyq dástúr men ónerdi dáripteýge, bilim ordasynyń rýhanı baılyǵyn arttyrýǵa múmkindik berdi.
Áz-Naýryz shymyldyǵy «Gákký» bı ansambli men «Qaǵanat», «Úrker» stýdenttik teatrlarynyń qatysýymen qoıylǵan «Mereıli Naýryz – Jańarýbastaýy» atty kompozısıamen ashyldy. Óner fakúlteti stýdentteriniń kásibı sheberligi alańdaǵy jurtty birden baýrap alyp, kórermendi ulttyq mıfologıa men tarıh qoınaýyna jetelep áketti.
Ulys toıyn saltanatty túrde ashqan Abaı atyndaǵy QazUPÝ Basqarma Tóraǵasy-Rektor Bolat Tilep júrekjardy lebizin bildirdi.
– Ǵasyrǵa jýyq tarıhy bar, qazaq biliminiń qarashańyraǵy – Abaı ýnıversıteti úshin Naýryz meıramy aıryqsha mánge ıe. Bul – tek tabıǵattyń jańarýy emes, rýhtyń jańǵyrýy, adam boıyndaǵy izgi qasıetterdiń qaıta túleýi. Biz bul merekeni ulttyń birligi men tatýlyǵyn aıshyqtaıtyn, bolashaqqa degen senimdi nyǵaıtatyn erekshe kezeń retinde baǵalaımyz. Sondyqtan da bizdiń ujym jyl saıyn Naýryzdy ulttyq dástúrmen sabaqtastyra otyryp, keń kólemde atap ótýdi ıgi dástúrge aınaldyrdy, – dedi Bolat Anapıauly.
Sodan keıin Ýnıversıtet qyzmetkerleriniń 4-9 jas aralyǵyndaǵy búldirshinderiniń arasyndaótken «Mereıli Naýryz» balalar shyǵarmashylyǵy baıqaýynyń jeńimpazdary án, bı jáne kórkemsóz nomınasııalary boıynsha marapattaldy. Sahnaǵa shyqqan eldiń erteńgi úmitteri kóńilge áserli qýanysh syılady. Sondaı-aq, rektor medıa keńistiktegi ýnıversıtettiń bedelin arttyrýǵa atsalysqan oqytýshylar men stýdentterge arnalǵan «Abai Media Awards» medıa baıqaýynyń jeńimpazdaryn marapattap, úzdikterge el aldynda arnaıy dıplomdar men syılyqtar tabystady.
Ulttyq sán men ónerdiń úndestigi de nazardan tys qalmady. «Gúlnaz Jeksenbek» brendiniń «Mura» toptamasy usynylǵan defıle men «Áýen – Tribe» dýetiniń óneri qazaqy naqyshtyń zamanaýı asyldyǵyn taǵy bir márte dáleldedi. Al qazaq estradasynyń juldyzdary – Qudaıbergen Bekish, Almas Kishkenbaev jáne «MýzArt Life» tobynyń áýezdi ánderi ashyq alańdy ásem saz ben shattyqqa bóledi.
Merekeniń taǵy bir ereksheligi – ulttyq sport oıyndarynan «Altyn saqa» aptalyǵynyńbastalýy boldy. Qazaq kúresi, arqan tartys, qoshqar kóterý, qol kúres jáne asyq atý syndy t.b. ulttyq oıyndarǵa qatysýshylar kúsh-jigeri men eptiligin, tózimdiligi men dáldigin synǵa saldy.
Alańda qyran búrkitter men júırik tazylardyń kórsetilimi uıymdastyrylyp, qazaq halqynyń saıatshylyq óneri keńinen nasıhattaldy. Sáıgúlik jylqylardyń ákelinýi de merekeniń kórkin odanári arttyryp, kóshpeli mádenıettiń aıryqsha belgisin aıshyqtaı tústi. Shara barysynda alyp batyrlar obrazyndaǵy ónerpazdardyń qatysýy da erekshe áser qaldyrdy. Ulttyq kıimdegi batyrlardyń kórinisi arqyly el qorǵaǵan erlerdiń rýhy dáriptelip, kórermenge tarıhı sabaqtastyq pen otansúıgishtik qundylyqtar tereńinen jetkizildi.
Taǵy bir aıta ketetin dúnıe, Ulys toıynda Abaı ýnıversıtetine «BankSentrKredıt» qarjylaı demeýshilik kórsetip, 16 oryndyq «JAC Sunray» markaly zamanaýı shaǵyn avtobýsyn syıǵa tartty.
Qoryta kelgende, bul kún – Abaı ýnıversıtetiniń birligin bekemdep, qazaqy salt-dástúrdi jańa qyrynan jańǵyrtqan, keń alańda erkin tynystaǵan ulttyq rýhtyń merekesi retinde este qaldy.
