21 naýryz kúni aýa raiynyń qolaisyzdyǵy men merekelik is-sharalarǵa bailanysty elimizdiń birneshe óńirinde avtokólik qozǵalysyna shekteý engizildi. Bul týraly «QazAvtoJol» ulttyq kompaniiasy málimdedi, dep habarlaidy Dalanews.kz
2026 jylǵy 21 naýryz saǵat 08:30-daǵy jaǵdai boiynsha Aqmola oblysynda «Astana — Atbasar — Jaqsy — Rýzaevka — Sarykól — Qostanai — RF shekarasy» avtojolynyń 346-407 shaqyrym aralyǵynda (Jaqsy kentinen Soltústik Qazaqstan oblysynyń shekarasyna deiin) barlyq kólik túrleriniń qozǵalysy shekteldi.
Soltústik Qazaqstan oblysynda osy baǵyttyń 407-429 shaqyrym aralyǵy (Aqmola oblysy shekarasynan Chistopole aýylyna deiin) jabyq. Sonymen qatar «Timiriazevo — Sarykól — Qostanai oblysynyń shekarasy» avtojolynyń 0-30 shaqyrym bóliginde de qozǵalysqa shekteý qoiyldy.
Pavlodar oblysynda «Astana — Shiderti — Pavlodar — Ýspenka — RF shekarasy» avtojolynyń «Qalqaman» jolairyǵynan Qalqaman aýylyna kireberis jáne Astana baǵytyna shyǵatyn bóliginde kólik qozǵalysy ýaqytsha toqtatylǵan.
Sondai-aq Soltústik Qazaqstan oblysyndaǵy «Jezqazǵan — Arqalyq — Petropavl» respýblikalyq mańyzy bar avtojolynyń 701-706 shaqyrym aralyǵy (Novoishimskoe aýyly ishinde) Naýryz merekesine bailanysty ýaqytsha jabyldy. Kólik qozǵalysy «Saýmalkól — Qazanka — Novoishimskoe — Chervonnoe» ainalma joly arqyly uiymdastyrylǵan.
Al Shyǵys Qazaqstan oblysynda Osinov asýynda (46-66 shaqyrym, Severnyi aýyly burylysy — Serebriansk qalasyna deiin) qysqy kezeńge bailanysty tirkemesi bar júk kólikterine qozǵalysqa shekteý saqtalyp otyr.
Jol qyzmetteri júrgizýshilerge saparlaryn aldyn ala josparlap, aýa raiy men jol jaǵdaiyn eskerýge keńes berdi. Qajet bolǵan jaǵdaida balama baǵyttardy paidalanǵan jón.
