Áleýmettik jelide tanymal Alagózovtar otbasynyń esimin paidalanyp, jurttan aqsha jinaýǵa shaqyratyn kúmándi jobalar paida boldy, dep habarlaidy dalanews.kz.
Bul týraly belgili telejýrnalist Aigúl Múkei aityp, qazaqstandyqtardy abai bolýǵa úndedi. Onyń sózinshe, elge tanymal adamdardyń atymen taralatyn jarnamalarǵa birden senýge bolmaidy. Sebebi mundai usynystardyń artynda alaiaqtyq shema turýy múmkin.
Jýrnalistiń aitýynsha, kúmán týdyrǵan baǵdarlamalardyń birine qatysý úshin aldymen 20 myń teńge, keiin taǵy 100 myń teńge aýdarý talap etilgen. Aigúl Múkei mundai jaǵdaida adamdardyń ońai aqshaǵa qyzyǵyp, aldanyp qalýy múmkin ekenin eskertti.
Ol eshkimniń sebepsiz aqsha taratpaitynyn aityp, "tegin irimshik tek qaqpanda bolady" degen qaǵidany umytpaýǵa shaqyrdy. Jýrnalist kez kelgen qarjylyq jobaǵa qatyspas buryn onyń shynaiylyǵyn muqiiat tekserý qajet ekenin jetkizdi.
Jeli qoldanýshylary da bul eskertýdi qoldap, tanymal tulǵalardyń nemese qaiyrymdylyq qorlarynyń atyn jamylyp aqsha suraityndarǵa senbeýge keńes berdi. Olardyń pikirinshe, aldyn ala jarna nemese qosymsha tólem talap etetin jobalarǵa asa saqtyqpen qaraǵan jón.
Qoldanýshylar qazaqstandyqtardy kúmándi siltemelerge ótpeýge, jeke derekterin bógde adamdarǵa bermeýge jáne aqsha aýdarmas buryn aqparattyń ras-ótirigin resmi derekkózder arqyly tekserýge shaqyrdy.
