Aqmola oblysynda polıseıler kómirtegi totyǵymen ýlanǵan júrgizýshini qutqaryp qaldy, dep habarlaıdy Dalanews.kz
Oqıǵa 20 naýryz kúni tańerteń Astana — Petropavl avtojolynda bolǵan.
"Saǵat 07:00 shamasynda polısıa qyzmetkerleri kapottyń astynan qalyń tútin shyqqan Gazel kóligin baıqaǵan. Olar birden kólikti tekserýge kirisken, alaıda ishinde otyrǵan adam jaýap bermegen. Sondyqtan ınspektorlardyń biri terezeni syndyrýǵa májbúr boldy. Kólik ishinde es-tússiz jatqan júrgizýshi anyqtaldy", - delingen habarlamada.
Polıseıler azamatty dereý taza aýaǵa shyǵaryp, alǵashqy medısınalyq kómek kórsetken.
Aldyn ala málimet boıynsha, 22 jastaǵy júrgizýshi qozǵaltqyshy qosýly kólikte uıyqtap qalyp, kómirtegi totyǵymen ýlanyp qalǵan. Qazirgi ýaqytta azamattyń ómirine qaýip tónip turǵan joq.
Polısıa turǵyndarǵa avtokólikti paıdalaný kezinde qaýipsizdik talaptaryn qatań saqtaýdy eskertedi.
