Memleket basshysy Qasym-Jomart Toqaev qazaqstandyqtardy Naýryz meiramymen quttyqtady, dep habarlaidy Dalanews.kz
"Barshańyzdy Ulystyń uly kúni – áz-Naýryz meiramymen shyn júrekten quttyqtaimyn! Áz-Naýryz – tazarý, jańarý ýaqyty. Tazalyq – mán-maǵynasy keń uǵym. Bul – eń aldymen, oi tazalyǵy, sana men niet tazalyǵy degen sóz", - dedi Prezident.
Memleket basshysy eki jyl buryn elimizde «Taza Qazaqstan» jalpyulttyq aktsiiasy bastaý alǵanyn eske saldy.
"Aýqymdy joba halyqtyń, ásirese, jastardyń jappai qoldaýyna ie boldy. Azamattarymyz tazalyqty qur sózben emes, naqty isimen kórsetýde. Uqyptylyq, jinaqylyq, tiianaqtylyq qasietteri ultymyzdyń jańa sapasyna ainala bastady.
Jalpy, «Taza Qazaqstan» bastamasy – jai ǵana kezekti saiasi naýqan nemese úgit-nasihat emes, bul – memleketimizdiń myzǵymas ideologiiasy. Sondyqtan osy igi ispen biz jyl boiy ainalysýymyz kerek, bul ult bolmysynyń ajyramas bóligi bolýǵa tiis. Ásirese, Ulystyń uly kúni tazalyq filosofiiasyn keńinen dáripteý mańyzdy", - dedi ol.
Prezident qazir Qazaqstanda túbegeili ózgerister kezeńi bastalǵanyn aitty.
"Bárimiz bir el bolyp Konstitýtsiialyq reformany tabysty júzege asyrdyq. Bul reformanyń tarihi mán-maǵynasy erekshe. Onyń el damýyna tigizetin yqpaly asa kúshti bolaryna kúmán joq.
Jańa Konstitýtsiia, eń aldymen, óskeleń urpaqtyń igiligi úshin qabyldandy, bul jastarǵa arnalǵan qujat desek, qate bolmaidy. Elimizge jany ashityn, iaǵni shyn máninde janashyr urpaq qana Qazaqstannyń kórkeiýine mol úles qosa alady. Elimizdiń keleshegi – otanshyl, jasampaz, jaýapkershiligi mol jastardyń qolynda.
Biz eshqandai kedergi men qiyndyqqa qaramai, elimizdi órkeniet jolyna shyǵarýymyz kerek. Halqymyzdyń tarihi taǵdyry – ózimizdiń qolymyzda.
Qazaqstannan basqa Otanymyz joq. Shyndyqty aitsaq, Qazaqstannyń damýy men órleýi bizden basqa eshkimge kerek joq. Sondyqtan qazirgi urpaq Otanymyzdyń baiandy bolashaǵy úshin barlyq jaǵdaidy jasaýy kerek.
Bárimiz bir ult bolyp, bir el bolyp osy uly tarihi joryqta mindetti túrde jeńiske jetýimiz qajet. Bul – bizdiń eń basty mindetimiz, missiiamyz", - dedi Toqaev.
Toqaev qazaqstandyqtarǵa amandyq pen tynyshtyq tiledi.
"Ulystyń uly kúni Jer Ana da, elimiz de jańaryp jatqan osy tarihi sátte aitylǵan tilektiń mán-maǵynasy airyqsha dep oilaimyn. Sondyqtan eń bastysy elimizge amandyq, jerimizge tynyshtyq tileimin. Qasietti Otanymyz – Qazaqstan Respýblikasy máńgi jasasyn! Ata zańymyz óz tuǵyrynan túspesin! Týymyz biikte jelbiresin! Ulys oń bolsyn, aq mol bolsyn! Elimizdiń tórt qubylasy túgel bolsyn", - dedi Memleket basshysy.
