Almaty qalasy boiynsha Ekonomikalyq tergep-tekserý departamenti «Eńbek resýrstaryn damytý ortalyǵy» AQ jáne «Birinshi kredittik biýro» JShS basshylyǵyna qatysty qylmystyq isti tergeýdi aiaqtady. Olarǵa laýazymdyq ókilettikterin teris paidalaný jáne para alý faktileri boiynsha kúdik taǵylyp otyr, dep habarlaidy Dalanews.kz
Tergeý málimetinshe, «Eńbek resýrstaryn damytý ortalyǵy» jeke tulǵalardyń tabystary týraly derekterdiń biryńǵai memlekettik operatory bolyp tabylady. Bul aqparat kredittik biýrolar men qarjy uiymdary úshin qaryz alýshylardyń tólem qabiletin baǵalaýda asa mańyzdy jáne onyń balamaly zańdy kózi joq.
Atalǵan derekterdi negizgi paidalanýshylar – «Memlekettik kredittik biýro» jáne «Birinshi kredittik biýro». Alaida 2020 jyly ortalyqtyń burynǵy prezidenti Dáýlet Argandykov pen «Birinshi kredittik biýronyń» bas direktory Rýslan Omarov arasynda zańsyz kelisim jasalǵany anyqtaldy. Sonyń nátijesinde «Birinshi kredittik biýro» qyzmetten alatyn úlesin 30 paiyzdan 35 paiyzǵa deiin arttyrǵan. Al ortalyqtyń úlesi kerisinshe 70 paiyzdan 65 paiyzǵa deiin tómendegen.
2025 jyldyń basynda ortalyqtyń prezidenti bolyp Asqar Sarbasov taǵaiyndalǵannan keiin de bul teńsiz sharttar saqtalǵan. Tergeý barysynda «Birinshi kredittik biýroǵa» artyqshylyq beretin arnaiy shema áshkerelendi. Atap aitqanda, eki uiym arasyndaǵy aqparat almasý júiesinde suranystardy jedel óńdeýge múmkindik beretin arnaiy servis ornatylǵan. Al «Memlekettik kredittik biýroǵa» qatysty júiede kerisinshe suranystardy baiaýlatatyn ziiandy baǵdarlamalyq qamtamasyz etý engizilgen.
Osynyń saldarynan memleketke, naqtyraq aitqanda «Eńbek resýrstaryn damytý ortalyǵyna» 2 mlrd teńgeden astam zalal keltirilgen.
Sonymen qatar 2025 jyldyń maýsymynda Argandykov pen Omarovtyń Sarbasovqa 75 myń AQSh dollary kóleminde zańsyz syiaqy bergeni anyqtaldy. Bul qarajat atalǵan zańsyz tabys tabý shemasyn saqtap qalý úshin berilgen.
Kúdiktiler ustalyp, sot sanktsiiasymen olardyń 1 mlrd teńgeden astam somaǵa baǵalanatyn jyljymaly jáne jyljymaityn múlkine, sondai-aq baǵaly qaǵazdaryna tyiym salyndy. Qylmystyq is materialdary taraptarǵa tanysý úshin joldanǵan.
Quqyq qorǵaý organdary Qazaqstan Respýblikasynyń zańnamasyna sáikes, sottyń zańdy kúshine engen úkimi shyqqanǵa deiin árbir adam kinásiz dep esepteletinin eske saldy.
