Taldyqorǵan qalasynda júzýden 2026 jylǵy Qazaqstan Respýblikasynyń jazǵy chempionaty bastaldy, dep habarlaidy dalanews.kz.
5-8 mamyr aralyǵynda ótetin jarysqa eldiń 17 óńirinen 372 sportshy qatysyp jatyr. Onyń ishinde 229 er adam jáne 143 áiel sportshy bar.
Biylǵy chempionat World Aquatics halyqaralyq kúntizbesine engen jáne halyqaralyq reitingtik jarys mártebesine ie. Sonymen qatar týrnir jeltoqsanda Qytaida ótetin qysqa qashyqtyqtaǵy álem chempionatyna, sondai-aq biyl kúzde Senegalda uiymdastyrylatyn Jasóspirimder Olimpiadasyna irikteý kezeńi sanalady.
Mańyzdy halyqaralyq jarystarǵa joldama sarapqa salynǵandyqtan, chempionatqa sheteldik sportshylar da qatysýda. Taldyqorǵandaǵy týrnirge Qyrǵyzstan, Resei, Tájikstan jáne Ózbekstan quramalary kelgen.
Jarystyń alǵashqy kúninde birden eki Qazaqstan rekordy jańardy. Aqtóbe oblysynyń sportshysy Gleb Kovalenia 50 metr erkin stilde 22.06 sekýnd nátije kórsetip, el rekordyn jańartty. Al Qaraǵandy oblysynyń ókili Kseniia Ignatova 200 metr keshendi júzýde 2:17.40 ýaqytpen Qazaqstannyń jańa rekordyn ornatty.
Áielder arasynda 200 metr erkin stilde Almaty quramasynyń sportshysy Daniela DIý 2:05.78 nátijesimen altyn medal jeńip aldy. Ekinshi oryndy Jetisý oblysynan Mariia Fedotova ielense, úshinshi oryn taǵy bir almatylyq Eva Mileninaǵa buiyrdy.
Erler arasyndaǵy osy qashyqtyqta Shymkent qalasynyń ókili Danil Cherepanov top jardy. Ol 1:51.68 nátijesin kórsetti. Kúmis júldeni Almaty sportshysy Maksim Klimenko alsa, qola medal Túrkistan oblysynyń júzýshisi Ǵalymjan Balabekke buiyrdy.
100 metr shalqalai júzýde Qaraǵandy oblysynyń sportshysy Kseniia Ignatova taǵy da úzdik atandy. Ol qashyqtyqty 1:01.51 ýaqytta baǵyndyrdy. Erler arasynda bul baǵdarlamada almatylyq Mansýr Raziev jeńiske jetti.
100 metr batterfliai ádisinde áielder arasynda Túrkistan oblysynyń ókili Sofia Spodarenko jeńimpaz atansa, erler arasynda Astana qalasynyń sportshysy Ádilbek Mýsin 52.81 nátijesimen altyn medal ielendi.
200 metr keshendi júzýde Kseniia Ignatova rekordpen birge chempion atandy. Erler arasynda bul qashyqtyqta almatylyq Daniil Chýjinov úzdik nátije kórsetti.
50 metr brass ádisinde áielder arasynda Almaty sportshysy Anna Pýpko jeńiske jetse, erler arasynda Aqmola oblysynyń ókili Aibat Myrzamuratov chempion boldy.
Estafetalyq jarystarda áielder arasynda Almaty quramasy altyn júlde aldy. Túrkistan oblysy ekinshi oryn ielense, Jetisý oblysy úzdik úshtikti túiindedi.
Al erler arasyndaǵy 4×100 metr erkin stil estafetasynda Aqmola oblysynyń komandasy chempion atandy. Shymkent quramasy kúmis, Soltústik Qazaqstan oblysy qola júldege ie boldy.
Jarysty uiymdastyryp otyrǵan Qazaq Aquatics federatsiiasy chempionattyń ótýine qoldaý kórsetken seriktesterge alǵys bildirdi. Olardyń qatarynda «Samuryq-Qazyna» qory, SportQory sportty qoldaý qory, «Qaztsink», Qazaqstan Ulttyq Olimpiada komiteti jáne Kcell kompaniiasy bar.
