Almatydaǵy Sátbaev ýniversitetinde Otan qorǵaýshylar kúni men Uly Jeńis merekesine orai saltanatty is-shara uiymdastyryldy. Merekelik jiynǵa ýniversitet basshylyǵy, professor-oqytýshylar quramy, Áskeri is institýtynyń ofitserleri men kýrsanttary, stýdentter, sondai-aq ardagerler men qurmetti qonaqtar qatysty, dep habarlaidy dalanews.kz.
Is-shara barysynda qatysýshylarǵa arnap quttyqtaý sóz sóilegen ýniversitet ókilderi qos merekeniń tarihi jáne rýhani mańyzyna erekshe toqtaldy. Atap aitqanda, Otan qorǵaýshylar kúni – el tynyshtyǵyn kúzetip, memleket shekarasyn qorǵap júrgen azamattarǵa kórsetiletin zor qurmettiń belgisi bolsa, Uly Jeńis kúni – Otan úshin janyn qiǵan batyrlardyń máńgilik erligin ulyqtaityn qasietti kún ekeni atap ótildi.
Jiynda ardagerlerge qurmet kórsetilip, olardyń erligi men ónegeli ómir joly jas urpaqqa úlgi retinde nasihattaldy. Uiymdastyrýshylar mundai taǵylymdy kezdesýler urpaqtar sabaqtastyǵyn nyǵaityp, tarihi jadyny saqtaýǵa yqpal etetinin jetkizdi.
Sondai-aq, Sátbaev ýniversiteti quramyndaǵy Áskeri is institýtynyń róline erekshe nazar aýdaryldy. Búginde munda bilim alyp jatqan kýrsanttar men qyzmet atqaryp júrgen ofitserler eldiń qorǵanys qabiletin nyǵaitýǵa úles qosatyn bolashaq mamandar retinde baǵalandy. Olarǵa tán ar-namys, adaldyq, tártip pen otansúigishtik qasietterdiń mańyzy atap ótildi.
Ýniversitet rektory Meiram Begentaevtyń sózinshe, Otanǵa adal qyzmet etken jaýyngerlerdiń erligi eshqashan umytylmaidy jáne ol urpaq jadynda máńgi saqtalatyn qundylyq bolyp qala beredi.
Merekelik shara sońynda qatysýshylar bir-birine izgi tilekterin bildirip, elimizdiń tynyshtyǵy men táýelsizdiginiń baiandy bolýyn tiledi.
