Алматыдағы Сәтбаев университетінде Отан қорғаушылар күні мен Ұлы Жеңіс мерекесіне орай салтанатты іс-шара ұйымдастырылды. Мерекелік жиынға университет басшылығы, профессор-оқытушылар құрамы, Әскери іс институтының офицерлері мен курсанттары, студенттер, сондай-ақ ардагерлер мен құрметті қонақтар қатысты, деп хабарлайды dalanews.kz.
Іс-шара барысында қатысушыларға арнап құттықтау сөз сөйлеген университет өкілдері қос мерекенің тарихи және рухани маңызына ерекше тоқталды. Атап айтқанда, Отан қорғаушылар күні – ел тыныштығын күзетіп, мемлекет шекарасын қорғап жүрген азаматтарға көрсетілетін зор құрметтің белгісі болса, Ұлы Жеңіс күні – Отан үшін жанын қиған батырлардың мәңгілік ерлігін ұлықтайтын қасиетті күн екені атап өтілді.
Жиында ардагерлерге құрмет көрсетіліп, олардың ерлігі мен өнегелі өмір жолы жас ұрпаққа үлгі ретінде насихатталды. Ұйымдастырушылар мұндай тағылымды кездесулер ұрпақтар сабақтастығын нығайтып, тарихи жадыны сақтауға ықпал ететінін жеткізді.
Сондай-ақ, Сәтбаев университеті құрамындағы Әскери іс институтының рөліне ерекше назар аударылды. Бүгінде мұнда білім алып жатқан курсанттар мен қызмет атқарып жүрген офицерлер елдің қорғаныс қабілетін нығайтуға үлес қосатын болашақ мамандар ретінде бағаланды. Оларға тән ар-намыс, адалдық, тәртіп пен отансүйгіштік қасиеттердің маңызы атап өтілді.
Университет ректоры Мейрам Бегентаевтың сөзінше, Отанға адал қызмет еткен жауынгерлердің ерлігі ешқашан ұмытылмайды және ол ұрпақ жадында мәңгі сақталатын құндылық болып қала береді.
Мерекелік шара соңында қатысушылар бір-біріне ізгі тілектерін білдіріп, еліміздің тыныштығы мен тәуелсіздігінің баянды болуын тіледі.
