Astana soty jýrnalist Botagóz Omarovaǵa qatysty bultartpaý sharasyn tańdap, ony eki ai merzimge úiqamaqqa jiberdi. Is «kórineý jalǵan aqparat taratý» baby boiynsha tergelip jatyr, dep habarlaidy Dalanews.kz
Bul týraly «Quqyqtyq media ortalyǵynyń» zańgeri Diana Okremova habarlady. Onyń aitýynsha, Astana qalalyq politsiia departamenti atalǵan bap boiynsha sotqa deiingi tergeý amaldaryn júrgizýde.
"O.B esimdi azamattyń aryzy boiynsha kórineý jalǵan aqparat taratý belgileri boiynsha sotqa deiingi tergeý tirkeldi. Tergeý aiasynda odan jaýap alý úshin politsiiaǵa shaqyryldy jáne onyń qatysýymen tergeý amaldary júrip jatyr",- dep jazylǵan politsiia habarlamasynda.
Qazirgi ýaqytta Botagóz Omarova is boiynsha qorǵanýǵa quqyǵy bar kýáger mártebesinde ótip jatyr. Onyń múddesin advokat Asel Tokaeva qorǵaýda.
Resmi organdar jýrnalistiń naqty qai materialyna qatysty tergeý júrgizilip jatqanyn jariialaǵan joq. Alaida kei derekterge súiensek, is Omarovanyń qurylys salasyndaǵy jumysshylardyń jalaqy máselesine qatysty jariialanymdarymen bailanysty bolýy múmkin. Atalǵan jumysshylar óz eńbekaqysyn ala almaǵanyn aityp, buqaralyq aqparat quraldaryna júgingen.
Jýrnalister qaýymy bul jaǵdaiǵa beijai qaramai, elordada Botagóz Omarovanyń úiiniń aldyna jinalyp, áriptesterine qoldaý bildirdi.
Jýrnalist Ainur Koskina bolǵan jaǵdaiǵa qatysty alańdaýshylyq bildirdi.
«Ne bolyp jatqanyn naqty bilmeimiz. Advokattan tek 274-bap boiynsha aryz túskenin estidik. Politsiia tarapynan óte qysqa ǵana jaýap berildi. Osy bapty paidalanyp, jýrnalisterdiń kásibi qyzmetine kedergi keltirý áreketi bolýy múmkin degen kúmán bar», – dedi ol.
Al jýrnalist Baqytnur Álibai atalǵan bapty qaita qaraý qajettigin atap ótti. Onyń pikirinshe, 274-bap jýrnalister men azamattyq qoǵam belsendileriniń jumysyna kedergi keltiredi.
«Bul tek Botagóz Omarovaǵa qarsy shara emes, jalpy qazaqstandyq jýrnalistika men azamattyq qoǵamǵa áser etetin jaǵdai», – dedi ol.
Jýrnalist Botagóz Iskakova da áriptesiniń kásibi deńgeiin atap ótti. Onyń aitýynsha, Omarova qoǵam úshin mańyzdy máselelerdi kóterip júrgen tájiribeli jýrnalist.
