Elimizdiń birqatar óńirinde 21 naýryz kúni aýa raiy qubylyp, qolaisyz meteorologiialyq jaǵdailar kútiledi. «Qazgidromet» mamandary tuman, kóktaiǵaq, ekpindi jel jáne kei óńirlerde shańdy daýyl bolatynyn eskertti, dep habarlaidy Dalanews.kz
Boljamǵa sáikes, Batys Qazaqstan oblysynyń soltústigi men shyǵysynda túngi jáne tańǵy ýaqytta tuman túsip, kóktaiǵaq bolýy yqtimal. Oral qalasynda da osyǵan uqsas jaǵdai qalyptasady.
Atyraý oblysynyń soltústiginde tańerteń tuman kútilse, kúndiz óńirdiń batysy men ońtústiginde shańdy daýyl turýy múmkin. Atyraý qalasynda da kúndiz shańdy daýyl soǵady dep boljanyp otyr.
Qostanai, Aqmola oblystarynyń birqatar aýmaǵynda tuman men kóktaiǵaq kútiledi. Astana qalasynda da osy kúni joldar taiǵaq bolyp, kóriný deńgeii tómendeýi múmkin.
Soltústik Qazaqstan oblysynda kóktaiǵaqpen qatar ekpindi jel boljanyp otyr. Kei jerlerde jeldiń jyldamdyǵy sekýndyna 15-20 metrge deiin jetýi múmkin. Petropavl qalasynda da qatty jel kútiledi.
Pavlodar, Qaraǵandy, Ulytaý jáne Shyǵys Qazaqstan oblystarynda tuman túsip, joldarda kóktaiǵaq bolýy yqtimal. Óskemen men Qaraǵandy qalalarynda da kóriný deńgeii tómendeidi.
Abai oblysynda tumanmen qatar jel kúsheiedi. Kei jerlerde jeldiń ekpini 15-20 m/s deiin jetýi múmkin.
Ońtústik óńirlerde de aýa raiy turaqsyz bolady. Jambyl oblysynyń taýly aýdandarynda jańbyr men naizaǵai kútiledi, sondai-aq tuman men ekpindi jel bolady. Túrkistan oblysynda da jańbyr, naizaǵai jáne tuman boljanǵan.
Jetisý oblysynda, ásirese Alakól kólderi mańynda jeldiń kúshi artyp, kei ýaqytta 23-28 m/s deiin jetýi múmkin.
Sinoptikter turǵyndardy aýa raiynyń kúrt ózgerýine bailanysty saq bolýǵa shaqyrady. Ásirese júrgizýshilerge jolda abai bolyp, alys saparlardy aldyn ala josparlaý usynyldy.
