Ál-Farabı atyndaǵy Qazaq ulttyq ýnıversıtetinde Qazaqstan Prezıdenti Qasym-Jomart Kemeluly Toqaevtyń tapsyrmasyna sáıkes, bilim alýshy jastarǵa kórsetilip jatqan memlekettik qoldaý sharalaryn túsindirý maqsatynda «Qazaqstannyń jastary – jasampaz» atty belsendi jastar jıyny ótti.
Erkin formatta ótken is-sharaǵa jastar uıymdarynyń kóshbasshylary, sheteldik stýdentter, jas ǵalymdar jáne qoǵam ómirine belsendi atsalysyp júrgen volonterlar jınaldy.
Ál-Farabı atyndaǵy QazUÝ-dyń Basqarma Tóraǵasy – Rektor Janseıit Túımebaev ýnıversıtettik ǵylym stýdentterden bastaý alý kerektigin atap ótip, memleket jáne bilim ordasy tarapynan jastarǵa árdaıym qoldaý kórsetiletinin atap ótti. Sondaı-aq oqý ornynyń bedeli bilimge umtylǵan izdenimpaz jastar arqyly kóteriletinin jetkizip, tehnologıa damyǵan ýaqytta jastardyń ǵylymǵa jańasha bet buryp, tyń ınovasıalyq jobalardy iske asyrýy qajettigin jetkizdi.
«Memleket basshysy Qasym-Jomart Toqaev: «Biz jurttan kósh ilgeri júretin el bolamyz. Úırenetin de, úıretetin de ult bolamyz. Jastar barlyq ózgeristiń bastaýynda turady. Bul ózgerister ádiletti Qazaqstandy qurý, zań men tártipti qamtamasyz etý tujyrymdamasyna negizdelgen», – dep atap ótti. Bizdiń QazUÝ jastary da jasampazdyq tanytyp, tyń ıdeıalar men ıgi isterdiń bastamashysy bolaryna kámil senemin», – dedi J.Túımebaev.
Kezdesý barysynda belsendi jastar men sheteldik stýdentter sóz sóılep, óz pikirleri men usynystaryn ortaǵa saldy.
«8 aqpan kúni Astana qalasynda Memleket basshysy Qasym-Jomart Kemeluly Toqaevtyń qatysýymen «Jańa adamdar» atty jastar forýmy ótti. Sol sharaǵa ýnıversıtet atynan qatysyp, qazirgi tańdaǵy asa ózekti áleýmettik máselelermen jumys júrgizip jatqan zamandastarymmen tanysyp qaıttym. Forýmda vandalızmmen, ruqsat etilmegen jerge qoqys tógýshilermen, kámeletke tolmaǵan balalarǵa ishimdik satýshylarmen, esirtki taratýshylarmen kúres máseleleri qozǵaldy. Zań men tártip ústemdigin ornatýdyń mańyzdylyǵy talqylandy. «Taza Qazaqstan» ekologıalyq aksıasynyń ıdeologıalyq máni túsindirildi. Búgin forýmnan alǵan áserimmen sizdermen bólise otyryp, aldaǵy ýaqytta osy túıtkilderdi birge sheshýge shaqyramyn», – dedi Prezıdent stıpendıasynyń ıegeri, «Jastar rýhy» jastar qanaty uıymynyń tóraıymy Áıgerim Esimhan.
«Ál-Farabı atyndaǵy QazUÝ-da bilim alý men úshin mártebe. Men munda óz bilimimdi jetildirip júrmin. Buıyrtsa, bilikti dárigerler qataryn tolyqtyryp, halyqqa adal qyzmet etetin bolamyn», – dedi sheteldik stýdent Nasbolla Faızı.
Búginde QazUÝ-da 54 memleketten kelgen 4 myńǵa jýyq stýdent bilim alýda. Kezdesýde rektor sheteldik stýdentterdiń belsendiligin arttyrýdy tapsyryp, jas ǵalymdardyń startap-jobalary men kreatıvti bastamalardy damytý men qoldaýǵa daıyn ekenin jetkizdi.
Ál-Farabı atyndaǵy QazUÝ-dyń Baspasóz qyzmeti
