Búgin Májilistegi «AMANAT» Fraktsiiasynyń músheleri ózgergen ýaqyt beldeýiniń halyqtyń fizikalyq jáne psihikalyq densaýlyǵyna, eńbek ónimdiligine jáne energetikalyq resýrstardy tutynýǵa áseri týraly zertteý nátijeleri boiynsha Úkimet esebin tyńdady.
Bul zertteý jumysy «AMANAT» Fraktsiiasynyń usynymyn iske asyrý sheńberinde 6 baǵyt boiynsha júrgizildi. Bedeldi ǵalymdar men sarapshylar, ǵylymi institýttar tartyldy. Zertteý barysynda geografiialyq parametrleri uqsas ár túrli memlekettiń tájiribesi nazarǵa alyndy.
Depýtattar aldynda Premer-Ministrdiń orynbasary Ermek Kósherbaev sóz sóiledi.
– Salystyrmaly taldaý jumysy Eýropadaǵy kóptegen damyǵan elderde Qazaqstanǵa uqsas tań atý jáne kún batý merzimi bar ekenin kórsetti. Atalǵan memleketter osyndai jaǵdaida belsendi damyp keledi. Adami kapitaldy damytý boiynsha da joǵary kórsetkishterge ie. Osyǵan bailanysty Úkimet biryńǵai ýaqyt beldeýin engizý týraly sheshimdi qoldai otyryp, ony tolyq negizdelgen dep sanaidy, – dedi vitse-premer.
Sondai-aq ol zertteý nátijeleri biryńǵai ýaqyt beldeýine kóshý eldegi bilim berý protsesiniń nátijelerine teris áser etpegenin, sondai-aq JKO men kóshedegi qylmys jaǵdaiyna aitarlyqtai áserin tigizbegenin rastady.
Sonymen qatar búginde Shyǵys Qazaqstan oblysynyń jeti aýdanynda jumys kestesine túzetý engizildi. Bul bastama jergilikti turǵyndar tarapynan keń qoldaý tapty.
Halyq qalaýlylarynyń suraqtaryna Saýda jáne integratsiia ministri Arman Shaqqaliev, Ǵylym jáne joǵary bilim ministri Saiasat Nurbek jáne Úkimettiń ózge de ókilderi jaýap berdi.
A. Shaqqalievtiń aitýynsha, aldyn ala derekter halyq ómiriniń negizgi kórsetkishine jáne ekonomikanyń negizgi salalarynyń jumys isteýine ózgergen ýaqyt beldeýiniń tigizgen teris áserin anyqtaǵan joq.
Densaýlyq saqtaý birinshi vitse-ministri Timýr Sultanǵaziev biryńǵai ýaqyt beldeýin engizý qadamy densaýlyq saqtaý salasyna oń ózgeris alyp kelgenin, aýrýlar sanynyń tómendegenin atap ótti. Máselen, jedel járdem shaqyrtý sany 0,4%-ǵa, júrek-qan tamyrlary aýrýlarymen syrqattaný kórsetkishi 3,5%-ǵa, psihikalyq jáne minez-qulyq buzylysy 1,6%-ǵa, jaraqattaný kórsetkishi 3,3%-ǵa, qaterli isikter kórsetkishi 1,7%-ǵa tómendegeni baiqaldy. Iaǵni, ýaqytty utymdy bólý – qoǵamdyq densaýlyqqa oń áserin tigizýde.
– Memleket basshysy «Ana tili» gazetine bergen suhbatynda Úkimet ýaqyt beldeýin aýystyrýdyń azamattardyń turmysyna jáne el ekonomikasyna áserin jan-jaqty zertteýi tiis ekenin atap ótti. Búgin Úkimet «AMANAT» fraktsiiasynyń depýtattaryna osy ǵylymi zertteýdiń qorytyndysyn tanystyrdy. Ol ǵalymdardyń, sarapshylardyń qatysýymen ótkizilip, Qazaqstanda biryńǵai ýaqytty engizý týraly sheshimniń ǵylymi negizdiligin kórsetti, – dedi Májilis Spikeri Erlan Qoshanov.
Talqylaý jumysyn qorytyndylai kele, depýtattar Úkimettiń ǵylymi-zertteý nátijesin qabyldady. Depýtattar zertteý qorytyndysyn qalyń buqaraǵa jetkizýdiń mańyzyn atap ótti.
Sonymen qatar, depýtattar Úkimetke jergilikti bilik organdarymen, máslihattarmen birlesip, elimizdiń biryńǵai ýaqyt beldeýine kóshýiniń mańyzy men ǵylymi negizi týraly arnaiy túsindirý jumysyn júrgizýdi usyndy. Bul jumysqa ǵalymdardy, sarapshylar tobynyń ókilderin, qoǵamdyq pikir kóshbasshylaryn belsendi tartý kerek. BAQ pen áleýmettik jelilerde tiisti aqparattyq jumys uiymdastyrý qajet.
Sonymen qatar, halyq suranysy men sheteldik tájiribeni eskere otyryp, jergilikti jerlerde jumys kestesin ózgertý tájiribesin jalǵastyrý kerek.
