Túrkistanda 19 naýryz kúni «Túrkistan – Túrki áleminiń týristik astanasy» atty týristik maýsymnyń ashylýy ótedi. Bul shara óńirdiń týristik áleýetin arttyryp, infraqurylymyn jaqsartyp, qonaqtarǵa joǵary deńgeide qyzmet kórsetý maqsatynda uiymdastyrylyp otyr. Bul týraly Túrkistan oblystyq týrizm basqarmasynyń basshysy Nurdáýlet Medeýov málimdedi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Biyl óńirimiz úshin tarihi oqiǵa oryn alýda. Túrkistan qalasyna erekshe mártebe berý týraly zań qabyldandy. Bul qujat – qalanyń halyqaralyq deńgeidegi týristik ortalyqqa ainalýyna úlken múmkindik beredi. Josparǵa sáikes, óńirge keletin týrister sanyn arttyryp, Túrkistannyń mádeni jáne rýhani murasyn keńinen nasihattaý kózdelip otyr, – dedi spiker.
Týristik maýsymnyń ashylý saltanatynda «Jana lep» shyǵarmashylyq ujymy, «Samǵaý» bi ansambli, ulttyq aspaptarda oryndaýshylar, DJ Shamil jáne basqa da ónerpazdar óner kórsetedi. Sonymen qatar, ot shoýy, siqyrshylar qoiylymy, baraban shoýy jáne poeziia keshteri uiymdastyrylady. Is-shara barysynda 2,5 tonna naýryz kóje daiyndalyp, Qazaqstannyń «Kinnes» rekordy jańartylmaq.
Sondai-aq, 19 naýryzda Túrkistan qalasynda «Túrkistan – túrki áleminiń rýhani astanasy» respýblikalyq týristik forýmy ótedi. Jiynǵa Ortalyq Aziia elderiniń týrizm salasyndaǵy biznes ókilderi men qolónershiler qatysady. Bul shara óńirdiń týristik salasyn damytýǵa jáne halyqaralyq yntymaqtastyqty nyǵaitýǵa yqpal etpek.
