تۇركىستاندا 19 ناۋرىز كۇنى «تۇركىستان – تۇركى الەمىنىڭ تۋريستىك استاناسى» اتتى تۋريستىك ماۋسىمنىڭ اشىلۋى وتەدى. بۇل شارا ءوڭىردىڭ تۋريستىك الەۋەتىن ارتتىرىپ، ينفراقۇرىلىمىن جاقسارتىپ، قوناقتارعا جوعارى دەڭگەيدە قىزمەت كورسەتۋ ماقساتىندا ۇيىمداستىرىلىپ وتىر. بۇل تۋرالى تۇركىستان وبلىستىق تۋريزم باسقارماسىنىڭ باسشىسى نۇرداۋلەت مەدەۋوۆ مالىمدەدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
– بيىل ءوڭىرىمىز ءۇشىن تاريحي وقيعا ورىن الۋدا. تۇركىستان قالاسىنا ەرەكشە مارتەبە بەرۋ تۋرالى زاڭ قابىلداندى. بۇل قۇجات – قالانىڭ حالىقارالىق دەڭگەيدەگى تۋريستىك ورتالىققا اينالۋىنا ۇلكەن مۇمكىندىك بەرەدى. جوسپارعا سايكەس، وڭىرگە كەلەتىن تۋريستەر سانىن ارتتىرىپ، تۇركىستاننىڭ مادەني جانە رۋحاني مۇراسىن كەڭىنەن ناسيحاتتاۋ كوزدەلىپ وتىر، – دەدى سپيكەر.
تۋريستىك ماۋسىمنىڭ اشىلۋ سالتاناتىندا «Jana lep» شىعارماشىلىق ۇجىمى، «سامعاۋ» بي ءانسامبلى، ۇلتتىق اسپاپتاردا ورىنداۋشىلار، DJ Shamil جانە باسقا دا ونەرپازدار ونەر كورسەتەدى. سونىمەن قاتار، وت شوۋى، سيقىرشىلار قويىلىمى، بارابان شوۋى جانە پوەزيا كەشتەرى ۇيىمداستىرىلادى. ءىس-شارا بارىسىندا 2،5 توننا ناۋرىز كوجە دايىندالىپ، قازاقستاننىڭ «كيننەس» رەكوردى جاڭارتىلماق.
سونداي-اق، 19 ناۋرىزدا تۇركىستان قالاسىندا «تۇركىستان – تۇركى الەمىنىڭ رۋحاني استاناسى» رەسپۋبليكالىق تۋريستىك فورۋمى وتەدى. جيىنعا ورتالىق ازيا ەلدەرىنىڭ تۋريزم سالاسىنداعى بيزنەس وكىلدەرى مەن قولونەرشىلەر قاتىسادى. بۇل شارا ءوڭىردىڭ تۋريستىك سالاسىن دامىتۋعا جانە حالىقارالىق ىنتىماقتاستىقتى نىعايتۋعا ىقپال ەتپەك.
