استانادا ارۋجان بيشٸمباەۆا مەن ايتبەك امانگەلدٸ اراسىنداعى سوت داۋى قارالدى, دەپ حابارلايدى dalanews.kz.
ارۋجان بيشٸمباەۆا – بۇرىنعى ۇلتتىق ەكونوميكا مينيسترٸ, 24 جىلعا سوتتالعان قۋاندىق بيشٸمباەۆتىڭ قارىنداسى. ال ايتبەك امانگەلدٸ – قۋاندىق بيشٸمباەۆپەن ازاماتتىق نەكەدە بولعان مارقۇم سالتانات نٷكەنوۆانىڭ اعاسى.
ەكٸ تاراپ اراسىنداعى داۋ ايتبەك امانگەلدٸنٸڭ «ەە زۆالي سالتانات» كٸتابىن شىعارعانىنان كەيٸن باستالعان. 2025 جىلدىڭ قاراشاسىندا ارۋجان بيشٸمباەۆا Instagram پاراقشاسىندا ايتبەك امانگەلدٸگە قاتىستى پٸكٸر جازعان.
جازبادا ول كٸتاپتىڭ ساتىلىمىنا قاتىستى ويىن بٸلدٸرٸپ, ايتبەك پەن ونىڭ تۋىستارىنا سىن ايتقان. سونداي-اق بيشٸمباەۆتىڭ اتىن اتاپ, بٸرنەشە سۇحبات بەرٸپ, وسى ارقىلى تانىمالدىق جيناپ جٷر دەگەن مازمۇنداعى پٸكٸر قالدىرعان.
وسىدان كەيٸن ايتبەك امانگەلدٸ اتالعان جازبالار ٶزٸنٸڭ ار-نامىسى مەن ٸسكەرلٸك بەدەلٸنە نۇقسان كەلتٸردٸ دەپ ەسەپتەپ, سوتقا جٷگٸنگەن.
سوت تاراپتاردىڭ ۋەجٸن تىڭداي كەلە, ارۋجان بيشٸمباەۆانى ەلەۋمەتتٸك جەلٸدە جازعان پٸكٸرٸن جوققا شىعارۋعا مٸندەتتەدٸ. سونىمەن قاتار ول ايتبەك امانگەلدٸگە مورالدىق زييان ٷشٸن 100 مىڭ تەڭگە تٶلەۋٸ تيٸس.
بۇدان بٶلەك, سوت ارۋجان بيشٸمباەۆاعا ٸس بويىنشا 1 127 000 تەڭگە كٶلەمٸندەگٸ شىعىندى ٶتەۋدٸ مٸندەتتەدٸ.
