Úkimet Memleket basshysynyń tapsyrmasyna sáikes, zańsyz iemdenilgen aktivter esebinen áleýmettik mańyzdy infraqurylym salý jobalaryn júzege asyrýda. Astanadaǵy Q. Muńaitpasov atyndaǵy eski stadionnyń ornyna jańasyn salýǵa Arnaýly memlekettik qordan 17,3 mlrd teńge qarajat bólý týraly sheshim qabyldandy, dep habarlaidy Dalanews.kz.
Q. Munaitpasov atyndaǵy ortalyq stadion 1936 jyly salynǵan. Qazirgi tańda eski ǵimarat jaramsyz bolǵandyqtan tolyǵymen bólshektelgen. Jańa stadionnyń qurylysy 2025 jyldyń sońynda aiaqtalady dep josparlanyp otyr.
Sport nysany qozǵalys múmkindigi shekteýli azamattarǵa arnalǵan oryndardy qosa alǵanda, 3598 orynǵa eseptelgen. Stadion UEFA halyqaralyq standarttaryna sai salynady. Qurylys aiaqtalǵannan keiin nysandy Astana qalasy ákimdiginiń №8 olimpiadalyq rezervtegi mamandandyrylǵan balalar-jasóspirimder sport mektebiniń balansyna berý josparlanyp otyr.
Jańa stadion oqý-jattyǵý jiyndary úshin qoldanysqa beriledi. Ony paidalanýǵa berilýi oqý-jattyǵý úderisin jaqsartýǵa, sportshylardy daiyndaýǵa ońtaily jaǵdai jasaýǵa jáne olardyń nátije kórsetý múmkindigin arttyrýǵa septigin tigizedi.
Búginde túrli óńirlerde áleýmettik mańyzy bar 16 nysan salýǵa Arnaýly memlekettik qordan 82 mlrd teńgeden astam qarjy bólindi. Atap aitqanda, 1 mýzykalyq mektepti qosqanda 7 mektep, 2 sport kesheni, kópsalaly aýrýhana kesheni, oblystyq jedel járdem stansasy, Arnaýly áleýmettik qyzmet kórsetý ortalyǵy, jataqhana jáne 2 balabaqsha bar. Sonymen qatar qarajat Qyzylorda oblysyndaǵy Aral aýdanynda sýmen jabdyqtaý júielerin salýǵa jáne jańǵyrtý jumystaryna baǵyttaldy.
