Ózbekstan úkimeti men Shveitsariianyń federaldyq keńesi “Tárkilengen aktivterdi bólý týraly kelisimge” qol qoidy. Bul qujat Ózbekstannyń tuńǵysh prezidenti Islam Karimovtyń úlken qyzy Gúlnara Karimovaǵa tiesili shamamen 182 million dollardy qaitarýdy kózdep otyr, dep habarlaidy Dalanews.kz "Evraziiskii brifing" telegram arnasyna silteme jasap.
Ózbekstan Ádilet ministrliginiń málimetinshe, Karimovanyń qarajaty “Uzbekistan Vision 2030” kópjaqty trast qory arqyly qaitarylady. Bul qor 2022 jyldyń jazynda Karimovanyń Shveitsariiada tárkilengen aktivterin qaitarý maqsatynda qurylǵan. 2024 jyldyń tamyzynda Ózbekstan men Shveitsariia osy qor arqyly alǵashqy 131 million dollardy qaitarý týraly kelisimge qol qoidy. Jańa kelisimmen birge qaitarylatyn jalpy qarajat kólemi 313 million dollarǵa jetti.
“Uzbekistan Vision 2030” qory arqyly qaitarylatyn qarjy halyq igiligine jumsalady, onyń ishinde densaýlyq saqtaý jáne bilim berý salalaryndaǵy áleýmettik mańyzdy jobalarǵa baǵyttalady.
2020 jyldyń mamyrynda Parijdegi kondominiým (10 million dollar) jáne 1815 jyly salynǵan Grýsse tarihi saraiynyń (10 million dollar) satylýynan túsken 20 million dollar Ózbekstanǵa qaitaryldy.
2023 jyldyń qyrkúieginde BUU-nyń ana men jańa týǵan nárestelerdiń ólim-jitimin azaitýǵa baǵyttalǵan baǵdarlamasyn qarjylandyrý úshin 43,5 million dollar bólindi.
Karimova men onyń qylmystyq tobyna tiesili aktivter Frantsiia, AQSh, Latviia jáne basqa elderde shamamen 1,4 milliard dollarǵa baǵalanady. 2018 jyly Latviia soty Karimovanyń 15,3 million dollarlyq qarajaty men 26 kg altyn sertifikatyn tárkileý týraly sheshim shyǵardy. Sondai-aq Rigadaǵy mádeni-oiyn-saýyq kesheni de Ózbekstan paidasyna tárkilendi.
Ózbekstan AQSh-pen birge Karimovaǵa tiesili 60 million dollardy qaitarý boiynsha jumys istep jatyr. Sonymen qatar, 2022 jyly Máskeý soty Karimovanyń alty páterin tárkileý týraly sheshim shyǵardy.
Gúlnara Karimovaǵa qatysty qylmystyq ister:
Karimova men oǵan tiesili kompaniialardyń qylmystyq áreketteri 2012 jyldan bastap tergelip keledi. Ol TeliaSonera, Vimpelcom, Alfa Telecom, MTS siiaqty telekommýnikatsiialyq kompaniialardan Ózbekstan naryǵyna kirýge ruqsat bergeni úshin iri kólemde para alǵan. Bul qarajat negizinen Shveitsariiada zańdastyrylǵan. 2018 jyly Shveitsariia Karimovanyń 555 million dollardan astam aktivin tárkiledi.
2013 jyldan bastap Ózbekstanda Karimovaǵa qatysty birneshe qylmystyq is qozǵaldy. Oǵan aqsha jymqyrý, salyq tóleýden jaltarý jáne qylmystyq uiym qurý aiyptary taǵyldy.
2020 jyldyń naýryzynda Ózbekstan Joǵarǵy soty Gúlnara Karimovany aqsha jymqyrý jáne bopsalaý qylmystary boiynsha kináli dep tanyp, 13 jyldan astam merzimge bas bostandyǵynan aiyrdy. Ol Tashkent mańyndaǵy áielder koloniiasynda jazasyn ótep jatyr.
Sol jyly Shveitsariia soty Karimovaǵa tiesili 293 million dollarlyq aktivti tárkileý týraly sheshim shyǵardy. Alaida, 2020 jyldyń sońynda Karimova Shveitsariia sotynda 350 million franktyq aktivti qaitaryp aldy.
Karimova AQSh, Shvetsiia, Frantsiia, Norvegiia, Niderlandy jáne Ulybritaniiadaǵy jemqorlyq pen zańsyz jolmen tabylǵan qarajatty jylystatýǵa qatysty isterde de kúdikti retinde tanylǵan.
