وزبەكستان ۇكىمەتى مەن شۆەيساريانىڭ فەدەرالدىق كەڭەسى “تاركىلەنگەن اكتيۆتەردى ءبولۋ تۋرالى كەلىسىمگە” قول قويدى. بۇل قۇجات وزبەكستاننىڭ تۇڭعىش پرەزيدەنتى يسلام كاريموۆتىڭ ۇلكەن قىزى گۇلنارا كاريموۆاعا تيەسىلى شامامەن 182 ميلليون دوللاردى قايتارۋدى كوزدەپ وتىر، دەپ حابارلايدى Dalanews.kz "ەۆرازييسكيي بريفينگ" تەلەگرام ارناسىنا سىلتەمە جاساپ.
وزبەكستان ادىلەت مينيسترلىگىنىڭ مالىمەتىنشە، كاريموۆانىڭ قاراجاتى “Uzbekistan Vision 2030” كوپجاقتى تراست قورى ارقىلى قايتارىلادى. بۇل قور 2022 جىلدىڭ جازىندا كاريموۆانىڭ شۆەيساريادا تاركىلەنگەن اكتيۆتەرىن قايتارۋ ماقساتىندا قۇرىلعان. 2024 جىلدىڭ تامىزىندا وزبەكستان مەن شۆەيساريا وسى قور ارقىلى العاشقى 131 ميلليون دوللاردى قايتارۋ تۋرالى كەلىسىمگە قول قويدى. جاڭا كەلىسىممەن بىرگە قايتارىلاتىن جالپى قاراجات كولەمى 313 ميلليون دوللارعا جەتتى.
“Uzbekistan Vision 2030” قورى ارقىلى قايتارىلاتىن قارجى حالىق يگىلىگىنە جۇمسالادى، ونىڭ ىشىندە دەنساۋلىق ساقتاۋ جانە ءبىلىم بەرۋ سالالارىنداعى الەۋمەتتىك ماڭىزدى جوبالارعا باعىتتالادى.
2020 جىلدىڭ مامىرىندا پاريجدەگى كوندومينيۋم (10 ميلليون دوللار) جانە 1815 جىلى سالىنعان گرۋسسە تاريحي سارايىنىڭ (10 ميلليون دوللار) ساتىلۋىنان تۇسكەن 20 ميلليون دوللار وزبەكستانعا قايتارىلدى.
2023 جىلدىڭ قىركۇيەگىندە بۇۇ-نىڭ انا مەن جاڭا تۋعان نارەستەلەردىڭ ءولىم-جىتىمىن ازايتۋعا باعىتتالعان باعدارلاماسىن قارجىلاندىرۋ ءۇشىن 43،5 ميلليون دوللار ءبولىندى.
كاريموۆا مەن ونىڭ قىلمىستىق توبىنا تيەسىلى اكتيۆتەر فرانسيا، اقش، لاتۆيا جانە باسقا ەلدەردە شامامەن 1،4 ميلليارد دوللارعا باعالانادى. 2018 جىلى لاتۆيا سوتى كاريموۆانىڭ 15،3 ميلليون دوللارلىق قاراجاتى مەن 26 كگ التىن سەرتيفيكاتىن تاركىلەۋ تۋرالى شەشىم شىعاردى. سونداي-اق ريگاداعى مادەني-ويىن-ساۋىق كەشەنى دە وزبەكستان پايداسىنا تاركىلەندى.
وزبەكستان اقش-پەن بىرگە كاريموۆاعا تيەسىلى 60 ميلليون دوللاردى قايتارۋ بويىنشا جۇمىس ىستەپ جاتىر. سونىمەن قاتار، 2022 جىلى ماسكەۋ سوتى كاريموۆانىڭ التى پاتەرىن تاركىلەۋ تۋرالى شەشىم شىعاردى.
گۇلنارا كاريموۆاعا قاتىستى قىلمىستىق ىستەر:
كاريموۆا مەن وعان تيەسىلى كومپانيالاردىڭ قىلمىستىق ارەكەتتەرى 2012 جىلدان باستاپ تەرگەلىپ كەلەدى. ول TeliaSonera، Vimpelcom، Alfa Telecom، متس سياقتى تەلەكوممۋنيكاسيالىق كومپانيالاردان وزبەكستان نارىعىنا كىرۋگە رۇقسات بەرگەنى ءۇشىن ءىرى كولەمدە پارا العان. بۇل قاراجات نەگىزىنەن شۆەيساريادا زاڭداستىرىلعان. 2018 جىلى شۆەيساريا كاريموۆانىڭ 555 ميلليون دوللاردان استام اكتيۆىن تاركىلەدى.
2013 جىلدان باستاپ وزبەكستاندا كاريموۆاعا قاتىستى بىرنەشە قىلمىستىق ءىس قوزعالدى. وعان اقشا جىمقىرۋ، سالىق تولەۋدەن جالتارۋ جانە قىلمىستىق ۇيىم قۇرۋ ايىپتارى تاعىلدى.
2020 جىلدىڭ ناۋرىزىندا وزبەكستان جوعارعى سوتى گۇلنارا كاريموۆانى اقشا جىمقىرۋ جانە بوپسالاۋ قىلمىستارى بويىنشا كىنالى دەپ تانىپ، 13 جىلدان استام مەرزىمگە باس بوستاندىعىنان ايىردى. ول تاشكەنت ماڭىنداعى ايەلدەر كولونياسىندا جازاسىن وتەپ جاتىر.
سول جىلى شۆەيساريا سوتى كاريموۆاعا تيەسىلى 293 ميلليون دوللارلىق اكتيۆتى تاركىلەۋ تۋرالى شەشىم شىعاردى. الايدا، 2020 جىلدىڭ سوڭىندا كاريموۆا شۆەيساريا سوتىندا 350 ميلليون فرانكتىق اكتيۆتى قايتارىپ الدى.
كاريموۆا اقش، شۆەسيا، فرانسيا، نورۆەگيا، نيدەرلاندى جانە ۇلىبريتانياداعى جەمقورلىق پەن زاڭسىز جولمەن تابىلعان قاراجاتتى جىلىستاتۋعا قاتىستى ىستەردە دە كۇدىكتى رەتىندە تانىلعان.
