Ulttyq statistika biýrosynyń aldyn ala derekterine sáikes, 2025 jyldyń qańtar–shilde ailarynda Qazaqstannyń jalpy ishki ónimi (JIÓ) byltyrǵy sáikes kezeńmen salystyrǵanda 6,3%-ǵa ósken. Taýar óndirý kólemi 8,3%-ǵa, qyzmetter 5,2%-ǵa (bul rette eń qarqyndy segment kólik pen saýda bolyp otyr), ónerkásip 6,9%-ǵa artty, dep habarlaidy Dalanews.kz.
JIÓ-niń ósýine eń kóp úles qosqan salalar:
- kólik jáne qoima – 22,5%,
- qurylys – 18,5%,
- kóterme jáne bólshek saýda – 8,6%,
- taý-ken ónerkásibi – 8,5%,
- óńdeý ónerkásibi – 6,1%.
Kólik jáne qoima salasyndaǵy qyzmet kólemi temirjol, qubyr jelileri jáne avtomobil kóligimen júk tasymaly kóleminiń joǵary bolýyna bailanysty 22,5%-ǵa ósti.
Qurylys salasynda jumys kólemi 18,5%-ǵa artty (2025 jyldyń qańtar–maýsymyndaǵy 18,4%-ben salystyrǵanda). Túrkistan oblysynda (+34,6%) mektepter, temirjol jelileri jáne avtojoldar qurylysy, Aqtóbe oblysynda (+25,6%) jaily mektepter qurylysy men joldardy rekonstrýktsiialaý, Jambyl oblysynda (+13,1%) jáne Shyǵys Qazaqstan oblysynda (+5,9%) turǵyn úiler, meditsinalyq nysandar jáne elektr jelilerin salý jobalaryn júzege asyrýǵa bailanysty joǵary ósim tirkelip otyr.
Saýda 8,6%-ǵa ósti (2025 jyldyń qańtar–maýsymynda 8,4%). Esepti kezeńde kóterme saýda 9,5%-ǵa ósip, jalpy ósimniń 66%-dan astamyn qamtydy, bólshek saýda 6,6%-ǵa artty. Aitarlyqtai dinamika Qostanai oblysynda (+17,6%), Soltústik Qazaqstan oblysynda (+12%) jáne Astanada (+9,2%) baiqaldy, munda astyq, agrohimiia, azyq-túlik, otyn, farmatsevtika ónimderin jáne tehnika satý kórsetkishteri qarqyndy túrde ósip keledi.
"Ónerkásip óndirisindegi ósim – 6,9%. Elimizdiń barlyq óńirinde ósim baiqaldy, biraq dinamika boiynsha kóshbasshylar – Jambyl oblysy (+18,2%), Soltústik Qazaqstan oblysy (+14,9%), Shymkent (+15,8%) jáne Almaty (+13,5%), sondai-aq Túrkistan oblysy (+12,3%). Óńdeý ónerkásibindegi ósimdi (6,1%) mashina jasaý (+14%), azyq-túlik (+9,2%), munai ónimderi (+8,6%), himiia ónerkásibi (+6%) jáne metallýrgiia (+1,3%) kórsetip otyr", delingen Ulttyq ekonomika ministrliginiń habarlamasynda.
Aýyl, orman jáne balyq sharýashylyqtaryndaǵy óndiris kólemi 3,7% deńgeiinde saqtaldy. Mal sharýashylyǵyndaǵy ósim sút (+6,1%), mal, qus bordaqylaý (+2,1%) jáne jumyrtqa (+0,9%) esebinen 3,4%-ǵa jetti.
Úkimet ekonomikadaǵy negizgi salalardy qoldaýǵa, ony ártaraptandyrýǵa jáne investitsiialyq belsendilikti yntalandyrýǵa erekshe nazar aýdara otyryp, ekonomikanyń turaqty ósimin qamtamasyz etý jónindegi Prezidenttiń tapsyrmalaryn júzege asyrý barysyn baqylaýda ustap otyr.
Aita ketsek, 2025 jyly 1 tamyzda Ulttyq ekonomika ministrligi 2024 jylǵy qorytyndy boiynsha JIÓ ósimi 4,8%-dan 5%-ǵa deiin arttyrý turǵysynda qaita qaralǵanyn málimdegen bolatyn.
