Qazaqstan men Ulybritaniia arasyndaǵy viza rejimi aldaǵy ýaqytta jeńildeýi múmkin. Bul jańa strategiialyq seriktestik týraly kelisimge bailanysty. Qujatty búgin Senat depýtattary ratifikatsiialady, dep habarlaidy Dalanews.kz.
Áńgime Qazaqstan Respýblikasy men Ulybritaniia, Soltústik Irlandiia Birikken Koroldigi arasyndaǵy strategiialyq seriktestik jáne yntymaqtastyq týraly kelisim jaiynda bolyp otyr. Buǵan deiin naýryzda qujatty Májilis maquldaǵan bolatyn.
Syrtqy ister ministriniń orynbasary Arman Isetovtyń aitýynsha, kelisim kúshine engennen keiin alǵashqy qadam retinde viza rásimderin jeńildetý qarastyrylady. Iaǵni stýdentterge, oqytýshylarǵa, resmi delegatsiialar men biznes ókilderine talaptar jeńildeýi múmkin.
Onyń sózinshe, Ulybritaniia keiingi ýaqytta kóshi-qon saiasatyn qatańdatyp jatqanymen, Qazaqstan bul máseleni ekijaqty kelissózder barysynda turaqty túrde kóterip keledi. Ratifikatsiia jańa kelissózderge negiz qalyptastyryp, viza rejimin jeńildetý baǵytyndaǵy dialogti ilgeriletýge múmkindik beredi.
Aita keteiik, 2025 jyly Ulybritaniia úkimeti kóshi-qondy qysqartý týraly resmi málimdeme jasaǵan. Al 2026 jyly 8 sáýirden bastap bul elde viza alymy ósti.
