Dikii Arman laqapatymen tanymal Arman Jumageldievtiń anasy dúnieden ótti,- dep habarlaidy Dalanews.kz.
Bul qaraly habardy áleýmettik jelide Arman Jumageldievtiń dosy Nurjan Imanaliev jetkizdi.
"Búgin júregimizdi aýyrtqan qaraly habar jetti… Ardaqty dosymyz Armannyń asyl anasy, qadirli Roza apai ómirden ozdy. Roza apaiymyz imandy, parasatty, sabyrly, tekti, aqylgói jan edi. Taǵdyrdyń aýyr synaqtaryn bastan ótkerdi… Jalǵyz ulyna uzaq jyl jaza berilip, balasynyń basyna bult úiirilgen qiyn kezeńder boldy. Biraq ana júregi sonyń bárine tózip, balasynan eshqashan teris ainalǵan joq", – dep jazdy Imanaliev.
Onyń aitýynsha, marqum Qostanaiǵa baryp, ulyn kórip qaitqan.
"Sol sátten keiin júrek aýyrtpalyǵyna shydai almai, aýrýhanaǵa túsip, sol jerde jaratýshysyna qaitty", – dedi ol.
Aita keteiik, Almaty qalalyq mamandandyrylǵan aýdanaralyq qylmystyq soty Qańtar oqiǵasy boiynsha Arman Jumageldievti 20 jylǵa bas bostandyǵynan aiyrǵan bolatyn.
