Ulytaý oblysynyń ákimdigi men «Qazaqmys korporasıasy» JSHS ózara túsinistik jáne yntymaqtastyq týraly memorandýmǵa qol qoıdy. Bekitilgen jobalar aıasynda 20 mlrd teńgeden astam somanyń bastamasyn júzege asyrý josparlandy, dep habarlaıdy Dalanews.kz.

Qujatqa Ulytaý oblysynyń ákimi Dastan Ryspekov pen «Qazaqmys korporasıasy» JSHS Basqarma tóraǵasy Rýslan Óskenáli qol qoıdy. Seriktestiktiń jańa kezeńi densaýlyq saqtaý, bilim berý, mádenıet, sport salalaryn, óńirdiń ınfraqurylymyn jańǵyrtýdy jáne óńir turǵyndarynyń ómir súrý sapasyn jaqsartýǵa jaıly jaǵdaı jasaýdy qamtıdy.

Adam kapıtalyn damytý strategıalyq baǵyttyń birine aınalady. Memorandým aıasynda Ulytaý ýnıversıteti ashylady. Atalǵan joba suranysqa ıe mamandardy daıarlaý men oblystyń jańa zıatkerlik ortalyǵyn qalyptastyrýdyń irgetasy bolady.

Bıyl Jezqazǵan qalasynda óńirdegi eń úlken ortalyq meshittiń qurylysy aıaqtalady. Sátbaev qalasynda jańa travmatologıalyq pýnkt ashylyp, óńirde balamasy joq «Namys» balalar men jasóspirimder sport akademıasy iske qosylady. 150 oryndyq ınternaty bar sport kesheninde oblystyń túkpir-túkpirinen kelgen daryndy jas sportshylar jattyǵady.

Memorandým qalalyq ortany damytýǵa baǵyttalǵan jańa jobalardy iske qosýdy qamtıdy. Jezqazǵanda «Jastar» saıabaǵy men «Ǵaryshkerler» baqjoly jáne Keńgir sý qoımasynyń jaǵalaýy abattandyrylyp, S. Qojamqulov atyndaǵy teatr kúrdeli jóndeýden ótedi. Nátıjesinde zamanaýı qoǵamdyq keńistik qalyptasyp, qala turǵyndary men qonaqtary úshin jańa ári jaıly demalys orny paıda bolady.

«Ulytau» fýtbol klýbyn qarjylandyrý jalǵasa beredi. Bul bastama óńirdiń kásibı sporttaǵy ornyn nyǵaıtyp, jastarǵa múmkindik beredi.

Sonymen qatar jergilikti atqarýshy organdarǵa ınfraqurylymdyq jobalardy júzege asyrýǵa kómektesý úshin sý tartý, sýmen jáne energıamen jabdyqtaý júıelerin jańǵyrtý boıynsha birqatar jobalyq-smetalyq qujattama ázirlenedi.

Qazaqmys korporasıasy úshin Ulytaý oblysy strategıalyq mańyzy bar óńir bolyp qala beredi. Áleýmettik bastamalardy júzege asyrý oblystyń turaqty damýyna tyń serpin berip, ınfraqurylymdy nyǵaıtýǵa jáne halyqtyń ómir súrý sapasy men jastardyń áleýetin arttyrýǵa yqpal etedi.