Májilis depýtaty Erlan Sairov Bas prokýratýraǵa qazaqstandyqtardyń Dýbaidaǵy jyljymaityn múlkin tekserý týraly depýtattyq saýal joldaýdy josparlap otyr, dep habarlaidy Dalanews.kz.
Jýyrda Dýbaidaǵy Fairmont The Palm turǵyn úi kesheni mańyna zymyran qulap, keiin órt shyqqan. Taiaý Shyǵystaǵy qaqtyǵystyń jańa kezeńi kezinde Birikken Arab Ámirlikterindegi keibir nysandar da soqqyǵa ushyraǵany aityldy.
Osydan keiin áleýmettik jelilerde osy keshende páteri bar qazaqstandyqtardyń, sonyń ishinde burynǵy sheneýnikterdiń múlki zardap shekti me degen másele qyzý talqylana bastady.
Jýrnalistik zertteýlerge súiensek, atalǵan turǵyn úi keshenindegi 97 páter qazaqstandyqtarǵa tiesili.
Páter ieleriniń arasynda kóbine «Eski Qazaqstan» kezeńimen bailanysty tulǵalardyń jaqyndary atalady. Tizimde, mysaly, burynǵy senat tóraǵasy Qairat Mámidiń uly, sondai-aq Almaty oblysynyń burynǵy ákimi Amandyq Batalovtyń jubaiy Baǵdat Batalova jáne basqa da adamdar bar ekeni aitylady.
Erlan Sairov bul jaǵdaiǵa quqyqtyq baǵa berý qajet dep esepteidi.
«Men Bas prokýratýranyń atyna hat joldaimyn dep oilaimyn, olar bul máselege quqyqtyq turǵydan baǵa bersin. Al moraldyq turǵydan alǵanda, menińshe, bul durys emes. Bul bizdiń eldiń halqyna qatysty tipti adamgershilikke jat nárse», - dedi Sairov Májilis kýlýarynda.
Depýtattyń aitýynsha, eger burynǵy qazaqstandyq sheneýnikter shetelde qymbat jyljymaityn múlikke ie bolsa, onda bul faktige qadaǵalaý organy quqyqtyq turǵydan baǵa berýi tiis.
Qazaqstandyqtardyń Dýbaidaǵy jyljymaityn múlki týraly másele buryn da kóterilgen. Bul taqyryp «Azattyq radiosynyń» iri jýrnalistik zertteýinen keiin birneshe ret talqylanǵan.
2025 jyldyń jeltoqsanynda Dýbaidaǵy qazaqstandyqtarǵa tiesili villalar aýktsion arqyly satylyp, olardyń jalpy quny shamamen 20 mlrd teńgeni quraǵan.
