Túrkiia parlamenti 15 jasqa deiingi balalarǵa áleýmettik jelilerdi paidalanýdy shekteýge baǵyttalǵan zań jobasyn qabyldady, dep habarlaidy Dala News.
Zańǵa sáikes, tsifrlyq platformalar kámeletke tolmaǵandarǵa qoljetimdilikti shekteý úshin jasyn tekserý júielerin engizýge mindetteledi. Sonymen qatar ata-analyq baqylaý quraldary iske qosylyp, ziiandy kontentke jedel áreket etý talap etiledi. 
Qujatqa engen negizgi talaptardyń biri – 15 jasqa deiingi balalarǵa akkaýnt ashýǵa tyiym salý. Sondai-aq YouTube, TikTok, Instagram siiaqty platformalar balalardyń qaýipsizdigin qamtamasyz etý boiynsha qosymsha mindettemeler alady. 
Bul bastama balalardy internettegi ziiandy kontentten qorǵaý maqsatynda qolǵa alynǵan. Túrkiia biligi áleýmettik jeliler jasóspirimderdiń psihikasyna keri áser etýi múmkin ekenin birneshe ret málimdegen. 
Sonymen qatar jańa zań onlain oiyn kompaniialaryna da talaptar qoiady – olar elde resmi ókil taǵaiyndaýy tiis. Zań talaptaryn oryndamaǵan kompaniialarǵa aiyppul salý nemese internet jyldamdyǵyn shekteý siiaqty sanktsiialar qoldanylýy múmkin. 
Qujat áli tolyq kúshine engen joq – ony Túrkiia prezidenti bekitýi tiis. 
Reuters agenttiginiń málimetinshe, bul zań áleýmettik qyzmetter týraly zańǵa engizilgen ózgeristerdiń bir bóligi bolyp tabylady jáne balalardy qorǵaýǵa baǵyttalǵan keń aýqymdy saiasattyń quramyna kiredi. 
Sarapshylardyń aitýynsha, Túrkiia bul baǵytta Avstraliia, Indoneziia jáne birqatar Eýropa elderiniń tájiribesine qosylyp otyr, onda da balalardyń áleýmettik jelilerge qoljetimdiligin shekteý máselesi qarastyrylyp jatyr. 
