Meta Platforms, Inc. kompaniiasy jasandy intellekt infraqurylymyna investitsiiany arttyrý úshin qyzmetkerleriniń 10%-yn qysqartpaq. Bul shamamen 8 myń adamǵa teń. Sonymen qatar kompaniia taǵy 6 myń bos jumys ornyna jańa maman izdeýdi toqtatady, dep habarlaidy Dalanews.kz.
Kompaniia qyzmetkerlerge joldaǵan hatynda bul sheshim tiimdilikti arttyrýǵa baǵyttalǵanyn jáne qazirgi investitsiialyq josparlardy qoldaýǵa múmkindik beretinin málimdegen. Meta-nyń 2026 jylǵa arnalǵan investitsiialyq jospary 135 mlrd dollardy quraidy.
Iri qysqartýǵa Microsoft Corporation ta daiyndalyp jatyr. Kompaniia shtattyń 7%-yn nemese shamamen 26 myń adamdy qysqartýy múmkin. Ázirge Microsoft jasy men eńbek ótiliniń jiyntyǵy 70 jyldan asqan qyzmetkerlerge erikti túrde jumystan ketýdi usynǵan.
Eki kompaniiadaǵy qysqartýdyń negizgi sebebi bir - jasandy intellektke jumsalatyn shyǵyndardyń artýy.
Bul ne degen sóz?
Sarapshylardyń pikirinshe, IT salasyndaǵy dástúrli mamandyqtardyń turaqtylyǵy álsirep barady. Jasandy intellekt kóptegen protsesti avtomattandyryp, buryn úlken komanda atqaratyn jumysty az adammen oryndaýǵa múmkindik berýde.
Meta ishinde de jańa baqylaý júieleri engizilip jatyr. Kompaniia qyzmetkerlerdiń jumys daǵdylary men áreket úlgilerin taldaityn Model Capability Initiative (MCI) quralyn synaqtan ótkizýde. Kei sarapshylar bul júie bolashaqta adam eńbegin almastyrýǵa baǵyttalýy múmkin dep sanaidy.
Kompaniia basshysy Mark Tsýkerberg buǵan deiin investorlarmen kezdesýinde: «Buryn úlken komanda qajet bolǵan jobalardy qazir óte talantty bir adam júzege asyra alady», - degen edi.
