Qala ákimdigi ornalasqan ákimshilik ǵimaratty kútip-ustaýǵa 11,2 mln teńgeden astam qarjy bólingen, dep habarlaidy Dala News.
Ashyq derekterge sáikes, kelisimshart 20 aqpanda jasalyp, 10 naýryzǵa deiin kúshinde bolǵan. Al 27 aqpanda tolyq soma — 11 mln 292 myń teńge — merdigerge tólengen.
Satyp alý bir kózden, tikelei kelisimshart jasaý arqyly júzege asqan.
Qujattarǵa sáikes, merdiger ǵimaratqa keshendi qyzmet kórsetýi tiis bolǵan. Onyń ishinde tazalyq jumystary, tehnikalyq jáne profilaktikalyq qyzmet, usaq ári shuǵyl jóndeý, elektr jáne santehnikalyq jumystar, beinebaqylaý júiesin kútip ustaý, sondai-aq turmystyq qyzmetter bar. Barlyq shyǵyn materialdaryn merdiger óz esebinen qamtamasyz etedi.
Jumystar kelisimshart jasalǵan kúnnen bastap 20 kún ishinde oryndalýy tiis. Kepildik merzimi – 12 ai. Osy ýaqyt ishinde anyqtalǵan aqaýlardy merdiger óz qarajaty esebinen joiýǵa mindetti.
Sondai-aq merdiger jaýapty tulǵany bekitip, onyń bailanys derekterin usynýy jáne jumys kestesin tapsyrys berýshimen kelisýi qajet. Ótinish túsken jaǵdaida, jumystardy 24 saǵat ishinde bastaý talap etiledi.
Aita keteiik, Qazaqstanda biýdjet qarajatyn únemdeý maqsatynda jańa ákimshilik ǵimarattardy salý men satyp alýǵa moratorii engizilgen. Ol 2028 jyldyń 31 jeltoqsanyna deiin kúshinde.
Ashyq málimetterge qaraǵanda, merdiger — jeke kásipker Nursulý Arstanǵalieva 2014 jyly Qurmanǵazy aýdanynda tirkelgen. Qyzmetkerler sany 6-10 adam shamasynda.
Kásipkerdiń negizgi qyzmeti — azyq-túlik saýdasy. Buǵan deiin ol negizinen mektepterge tamaq jetkizý jáne bilim berý uiymdarymen bailanysty kelisimsharttarǵa qatysqan.
Soǵan qaramastan, biyl ol qala ákimdigi ǵimaratyna qyzmet kórsetý boiynsha kelisimshartty konkýrssyz, tikelei alǵan.
Nelikten mundai qyzmet baǵyty sáikes kelmeitin merdiger tańdalǵany jáne aldaǵy ýaqytta osyndai kelisimder jasala ma — bul suraqtarǵa ákimdik ázirge túsinikteme bermedi.
Redaktsiia tiisti organdarǵa resmi saýal joldady.
