قالا اكىمدىگى ورنالاسقان اكىمشىلىك عيماراتتى كۇتىپ-ۇستاۋعا 11،2 ملن تەڭگەدەن استام قارجى بولىنگەن، دەپ حابارلايدى Dala News.
اشىق دەرەكتەرگە سايكەس، كەلىسىمشارت 20 اقپاندا جاسالىپ، 10 ناۋرىزعا دەيىن كۇشىندە بولعان. ال 27 اقپاندا تولىق سوما — 11 ملن 292 مىڭ تەڭگە — مەردىگەرگە تولەنگەن.
ساتىپ الۋ ءبىر كوزدەن، تىكەلەي كەلىسىمشارت جاساۋ ارقىلى جۇزەگە اسقان.
قۇجاتتارعا سايكەس، مەردىگەر عيماراتقا كەشەندى قىزمەت كورسەتۋى ءتيىس بولعان. ونىڭ ىشىندە تازالىق جۇمىستارى، تەحنيكالىق جانە پروفيلاكتيكالىق قىزمەت، ۇساق ءارى شۇعىل جوندەۋ، ەلەكتر جانە سانتەحنيكالىق جۇمىستار، بەينەباقىلاۋ جۇيەسىن كۇتىپ ۇستاۋ، سونداي-اق تۇرمىستىق قىزمەتتەر بار. بارلىق شىعىن ماتەريالدارىن مەردىگەر ءوز ەسەبىنەن قامتاماسىز ەتەدى.
جۇمىستار كەلىسىمشارت جاسالعان كۇننەن باستاپ 20 كۇن ىشىندە ورىندالۋى ءتيىس. كەپىلدىك مەرزىمى – 12 اي. وسى ۋاقىت ىشىندە انىقتالعان اقاۋلاردى مەردىگەر ءوز قاراجاتى ەسەبىنەن جويۋعا مىندەتتى.
سونداي-اق مەردىگەر جاۋاپتى تۇلعانى بەكىتىپ، ونىڭ بايلانىس دەرەكتەرىن ۇسىنۋى جانە جۇمىس كەستەسىن تاپسىرىس بەرۋشىمەن كەلىسۋى قاجەت. ءوتىنىش تۇسكەن جاعدايدا، جۇمىستاردى 24 ساعات ىشىندە باستاۋ تالاپ ەتىلەدى.
ايتا كەتەيىك، قازاقستاندا بيۋدجەت قاراجاتىن ۇنەمدەۋ ماقساتىندا جاڭا اكىمشىلىك عيماراتتاردى سالۋ مەن ساتىپ الۋعا موراتوريي ەنگىزىلگەن. ول 2028 جىلدىڭ 31 جەلتوقسانىنا دەيىن كۇشىندە.
اشىق مالىمەتتەرگە قاراعاندا، مەردىگەر — جەكە كاسىپكەر نۇرسۇلۋ ارستانعالييەۆا 2014 جىلى قۇرمانعازى اۋدانىندا تىركەلگەن. قىزمەتكەرلەر سانى 6-10 ادام شاماسىندا.
كاسىپكەردىڭ نەگىزگى قىزمەتى — ازىق-تۇلىك ساۋداسى. بۇعان دەيىن ول نەگىزىنەن مەكتەپتەرگە تاماق جەتكىزۋ جانە ءبىلىم بەرۋ ۇيىمدارىمەن بايلانىستى كەلىسىمشارتتارعا قاتىسقان.
سوعان قاراماستان، بيىل ول قالا اكىمدىگى عيماراتىنا قىزمەت كورسەتۋ بويىنشا كەلىسىمشارتتى كونكۋرسسىز، تىكەلەي العان.
نەلىكتەن مۇنداي قىزمەت باعىتى سايكەس كەلمەيتىن مەردىگەر تاڭدالعانى جانە الداعى ۋاقىتتا وسىنداي كەلىسىمدەر جاسالا ما — بۇل سۇراقتارعا اكىمدىك ازىرگە تۇسىنىكتەمە بەرمەدى.
رەداكسيا ءتيىستى ورگاندارعا رەسمي ساۋال جولدادى.
