Qarmet kompaniiasy halyqaralyq yntymaqtastyqty keńeitip, Qytai naryǵyna kómir kontsentratyn jetkizýdi bastady, dep habarlaidy Dala News.
Seriktes retinde 1988 jyly qurylǵan China National Fuel Corporation Limited (CNF) korporatsiiasy qatysady. Bul kompaniia koksteletin kómirdi jáne tozańdy kómirdi jetkizýmen, sondai-aq mys rýdasy, temir rýdasy jáne kúkirt tasymalymen ainalysady.
Jetkiziletin ónim koksteletin kómir sanatyna jatady jáne metallýrgiiada koks óndirý úshin paidalanylady — bul domna protsesiniń negizgi komponenti. Dál osy koks temirdi kennen bólip alýdy qamtamasyz etip, domna peshteriniń turaqty jumysyn ustaidy jáne shoiyn men bolat óndirýdiń ózindik quny men tiimdiligine tikelei áser etedi.
Jańa eksporttyq baǵyttyń iske qosylýy tek satý naryǵyn keńeitý turǵysynan ǵana emes, sonymen qatar Qarmet óndiristik qýattarynyń turaqty júktelýi úshin de mańyzdy. Kómir kontsentratynyń turaqty jetkizilimderi kompaniia shahtalary men baiytý fabrikasynyń úzdiksiz jumysyn qamtamasyz etip, kómir óndirýden bastap ony metallýrgiiaǵa daiyndaýǵa deiingi óndiristik tizbektiń turaqtylyǵyn saqtaidy.
Bul iri metallýrgiialyq jáne ónerkásiptik naryqta suranysqa ie strategiialyq ónim jáne kómir divizionynyń turaqty júktemesin qamtamasyz etetin perspektivaly baǵytty qalyptastyrady.
«Jasalǵan kelisim aiasynda K+KJ markaly kómir kontsentratymen alǵashqy tájiribelik temirjol baǵyty Dostyq – Alashankoý shekara ótkeli arqyly uiymdastyryldy. Alǵashqy jóneltý sáýir aiynda júzege asyryldy: Qytaiǵa kólemi 4,3 myń tonnadan astam quram jiberildi. Júk qabyldaý stantsiiasyna jetti. Qazirgi ýaqytta kómir kontsentraty tutynýshyǵa tájiribelik-ónerkásiptik synaqtar júrgizý úshin berildi. Olardyń nátijesi yntymaqtastyqty keńeitý jáne Qytai kásiporyndaryna jetkizilim kólemin aiyna 40 myń tonnaǵa deiin kezeń-kezeńimen arttyrý úshin negiz bolady», — dep atap ótti kompaniia ókilderi.
Qarmet úshin bul jai ǵana bir rettik jetkizilim emes, eksporttyq baǵytty damytýdaǵy jáne syrtqy naryqtardaǵy pozitsiiany nyǵaitýdaǵy mańyzdy qadam. Álemdegi eń iri metallýrgiialyq shikizat tutyný ortalyqtarynyń biri — Qytai naryǵyna shyǵý uzaq merzimdi áriptestik ornatýǵa, klienttik portfeldi ártaraptandyrýǵa jáne baiytý fabrikasynyń óndiristik qýattaryn turaqty júkteýge jańa múmkindikter ashady.
Jobanyń júzege asýy kompaniianyń jetkizý geografiiasyn keńeitý jáne halyqaralyq kooperatsiiany damytý jónindegi strategiialyq baǵytyn rastaidy. Bul Qarmet-tiń TMD elderinde ǵana emes, alys shetel naryqtarynda da sapaly kómir kontsentratynyń senimdi jetkizýshisi retindegi rólin kúsheitedi.
