Qaraǵandy jáne Qostanaı oblystaryndaǵy alty adamnyń ólimine sebep bolǵan toptyq jazataıym oqıǵalardy tekserý úshin arnaıy komısıa quryldy. Bul týraly Eńbek jáne halyqty áleýmettik qorǵaý mınıstrliginiń memlekettik eńbek ınspeksıasy komıteti habarlady, dep jazady Dalanews.kz.
Tergeý nátıjesinde bolǵan qaıǵyly oqıǵalardyń mán-jaıy men sebepteri anyqtalady.
“2024 jyly 5 qazanda saǵat 19:30-da "Qazaqmys korporasıasy" JSHS "Saıaq" kenishiniń aýmaǵynda – "Balqashtústimetall" ÓB-de taý-ken sheberi 1990 jyly týǵan D.Igembaev, tespe burǵylaýshy 1967 jyly týǵan O. Zekeı jáne burǵylaýshynyń kómekshisi 2001 jylǵy M.Turyspaev belgisiz gazben ýlanǵan. Jazataıym oqıǵa saldarynan D.Igembaev pen M.Turysbaev qaza taýyp, O.Zekeı Balqash qalasyndaǵy qalalyq aýrýhanaǵa jiberildi”, – delingen habarlamada.
Jazataıym oqıǵanyń mán-jaılary men sebepterin tergep, tekserý úshin Qaraǵandy oblysy boıynsha bas memlekettik eńbek ınspektorynyń tóraǵalyǵymen arnaıy komısıa quryldy.
2024 jyly 6 qazan kúni Rýdnyı qalasynda "Imperial Agro Group" JSHS jalǵa alǵan dıirmen kesheniniń aýmaǵynda №5 un býnkerinen 1987 jyly týǵan E.Boshykovtyń, 1994 jyly týǵan A.Ótegenovtiń, 1978 jylǵy D.Kalaýovtyń jáne 1976 jyly týǵan S.Shakırtaevanyń máıiti tabyldy.
"Imperial Agro Group" JSHS basshysynyń aıtýynsha, E.Boshyqov iske qosý-retteý jumystary boıynsha tehnolog retinde azamattyq-quqyqtyq sıpattaǵy shart boıynsha qyzmet etken. Ol ózge qaıtys bolǵan azamattar týraly eshteńe bilmeıdi. Óıtkeni aıtýynsha, atalǵan adamdarmen eńbek qatynastary bolmaǵan.
Bolǵan oqıǵanyń barlyq mán-jaıyn anyqtaý jáne atalǵan azamattarmen eńbek qatynastarynyń bolýyn nemese bolmaýyn anyqtaý úshin Memlekettik eńbek ınspeksıasy komıtetiniń Qostanaı oblysy boıynsha departamenti komısıa qurdy.
