Qarjy naryǵyn retteý jáne damytý agenttiginiń tóraǵasy Mádina Ábilqasymova bankter men mikroqarjy uiymdarynyń (MQU) strestik aktivterin satýǵa arnalǵan alǵashqy tsifrlyq platforma – DMAS-tyń iske qosylǵanyn málimdedi, dep habarlaidy Dalanews.kz.
Saýda-sattyq resmi túrde Almatyda ótken Central Asia FinTech Summit 2024 forýmy barysynda bastaldy.
Platformany ázirlegen – Birinshi kredittik biýro, ol banktik jáne mikroqarjylyq aktivterdi satatyn elektrondyq saýda alańy operatorynyń qyzmetin júzege asyrý quqyǵy ruqsatyna ie.
Agenttik basshysy strestik aktivterdi satatyn alǵashqy elektrondyq alańdy iske qosý Prezident Q.K. Toqaevtyń strestik aktivterdi ekonomikalyq ainalymǵa naryqtyq negizde qaitarý jónindegi tapsyrmasyn iske asyrý aiasyndaǵy mańyzdy qadam ekenin atap ótti.
"Búgin biz tsifrlyq platformada strestik aktivterdiń alǵashqy saýda-sattyǵyn bastaimyz, bul problemalyq aktivterdi ekonomikaǵa qaitarýǵa yqpal etetin jáne investorlar arasynda senimniń ósýin yntalandyratyn eldiń qarjy sektoryn damytýdaǵy mańyzdy qadam bolyp tabylady", – dedi Mádina Ábilqasymova.
Agenttik tóraǵasy qarjy retteýshisi bankterdi problemalyq kreditterden arylýǵa yntalandyrý boiynsha josparly jumys júrgizgenin atap ótti. 2022 jyly naryqtyq qaǵidattarmen strestik aktivter naryǵynyń paida bolýy úshin jaǵdailar jasalǵan bolatyn. Strestik aktivterdi jeke investorlarǵa, onyń ishinde sheteldik investorlarǵa satyp alýǵa ruqsat etildi. Budan basqa, naryqtyń barlyq qatysýshylary úshin teń jaǵdai jasaityn salyq salý rejimi qamtamasyz etildi, servistik kompaniialar institýty kózdelgen, bankterdiń jáne strestik aktivterdi basqarý jónindegi bankterdiń enshiles uiymdarynyń (SABU) balanstarynda strestik aktivterdiń bolý kezeńi úsh jylǵa deiin qysqartyldy.
2017 jyldan bastap qabyldanǵan sharalar nátijesinde bank sektoryndaǵy strestik aktivter 2024 jylǵy shildege qarai 7,7 trln teńgeden 3,2 trln teńgege deiin tómendedi. Bul rette tólem merzimi 90 kúnnen asa keshiktirilgen kreditter deńgeii eń tómengi mánge jetip, shamamen 1 trln teńgeni qurady.
"Memleket basshysynyń tapsyrmasyn iske asyrý úshin aǵymdaǵy jylǵy maýsymda akkredittelgen tsifrlyq platformalar arqyly ǵana strestik aktivterdi satýdy kózdeitin zań qabyldandy.Zańdy iske asyrý úshin Agenttik tsifrlyq platformalardyń qyzmetine ruqsat berý tártibin, osy platformalarda saýda-sattyq ótkizý qaǵidalaryn, sondai-aq aqparattyq jáne kiberqaýipsizdik standarttaryn reglamentteitin normativtik-quqyqtyq aktilerdi qabyldady", - dep sózin tolyqtyrdy Mádina Ábilqasymova.
Agenttik basshysy strestik aktivter saýdasyn tsifrlandyrý naryqtyń ashyqtyǵyn qamtamasyz etetin, investorlardy kóbirek tartatyn jáne bank sektoryn strestik aktivterden tazartýdy yntalandyratyn mańyzdy naryqtyq tetikke ainalatynyn erekshe atap ótti.
DMAS tsifrlyq platformasy strestik aktivtermen saýda jasaý protsesin jeńildetetin jáne jedeldetetin zamanaýi tsifrlyq platforma bolyp tabylady. Júie kreditter men óndirilgen múlikti qosa alǵanda, aktivterdiń keń aýqymyna qol jetkizýdi qamtamasyz etedi.
Saýda-sattyqty avtomattandyrý protsesti ashyq ári ádil etedi, al Agenttik bekitken qaǵidalar barlyq qatysýshylardyń múddelerin qorǵaýdy qamtamasyz etedi. Mámileler onlain rejiminde resimdeledi, bul operatsiialardyń yńǵailylyǵy men boljamdylyǵyn arttyrady.
