Aqmola oblysyndaǵy at sporty klýbynda bolǵan eki oqiǵa qoǵam nazaryn aýdardy. Atpen serýendeýge barǵan jas jigit pen qyz aýyr jaraqat alǵan. Zardap shekkenderdiń jaqyndary klýb qyzmetkerlerin qaýipsizdik talaptaryn saqtamady dep aiyptap otyr, dep dalanews.kz tilshisi Cmn.kz saityna silteme jasap habarlaidy.
20 jastaǵy Dinmuhamed mamyr aiynda toptyq serýen kezinde attan qulap, besinshi moiyn omyrtqasyn syndyrǵan jáne julynyn zaqymdap alǵan.
Jigittiń otbasynyń aitýynsha, oqiǵadan keiin klýb qyzmetkerleri jedel járdem shaqyrmaǵan. Dinmuhamedti omyrtqasyn qozǵaltpai ustaityn arnaiy quralsyz jeke kólikke salyp, oily-qyrly jolmen kiiz úige jetkizgen. Ol dosy shaqyrǵan meditsina qyzmetkerlerin shamamen 40 minýt kútken.
Jedel járdem brigadasynda moiyndy bekitetin arnaiy jaǵa bolmaǵany da aitylady. Aýyr jaraqat alǵan jigittiń denesi tolyq sal bolyp, bes ret ota jasalǵan. Ol bir aiǵa jýyq jansaqtaý bóliminde jatyp, qazir apparattyń kómegimen tynys alyp jatyr. Dinmuhamedke táýlik boiy kútim qajet.
Jaqyndarynyń sózinshe, oqiǵadan keiin klýb ókilderi jigittiń jaǵdaiyn suramaǵan, emdelýine nemese ońalýyna qarjylai kómek kórsetpegen.
Otbasy klýb qyzmetkerleri men meditsinalyq toptyń áreketin tekserýdi talap etip otyr. Olar zardap shegýshini durys tasymaldamaý jáne der kezinde kómek kórsetpeý onyń jaǵdaiyn aýyrlatýy múmkin dep esepteidi.
11 maýsymda osy at sporty klýbynda taǵy bir qyz jaraqat alǵan. Onyń aitýynsha, serýen kezinde nusqaýshy attardy birneshe ret qatty shabýǵa ruqsat bergen.
"Qatty jyldamdyqpen kele jatqanda er-toqym taiyp ketip, atpen birge jerge quladym", – dedi zardap shekken qyz.
Qyzǵa atty nusqaýshy emes, kámeletke tolmaǵan bala bergen. Onyń kózinshe er-toqymnyń durys bekitilgeni tekserilmegen.
Qulaǵannan keiin klýb direktory qyzǵa aýyrsynýdy basatyn dári egip, qolyn tańyp qoiǵan. Al aýrýhanada oǵan oń jaq iyq súieginiń synýy diagnozy qoiylyp, shuǵyl ota jasalǵan.
Zardap shegýshiniń sózinshe, klýb ókilderi bastapqyda kómek kórsetýge ýáde bergen. Alaida ol politsiiaǵa júgingennen keiin bailanysqa shyqpai qoiǵan.
Qazirgi ýaqytta atalǵan oqiǵalar boiynsha tergeý júrip jatyr. Al klýb ókilderi bolǵan jaǵdaiǵa zardap shekken qyzdyń ózin kináli dep sanaityny aityldy.
